O xumer le Fariseiengo.
1 Le Farisea thai le Sadušeia pašile le Isusostar, thai kaste zumaven les, mangline Lestar te sîkavel lengă khă sămno andoa čeri.
2 Čeačio phendimos, O phendea lengă: „Kana dikhăn kă avel e reat, tume phenen: „Sî te avel čiro šukar, kă o čeri sî lollo.”
3 Thai dă droboitu, phenen: „Ades sî te avel barobrîšind, kă o čeri sî lollo-xoleariko.” Atxaditorea, o mui le čerehko jeanen te prinjeanen, thai le semne le čirohkă našti prinjeanen le?
4 Khă neamo čior thai but kurvari mangăl khă sămno; či dela pe lengă aver sămno sar o sămno le proorokohko le Ionahko.” Pala kodea muklea le thai gălotar.
5 Le jene nakhlesas ande kolaver rig thai bîstărdesas te len manŕo.
6 O Isus phendea lengă: „Le sama thai arakhăn tume le xumerăstar le Fariseiengo thai le Saducheiengo.”
7 Le jene denas pe godi, thai motonas ande lende: „Phenel amengă kadea anda kă či leam manŕo!”
8 O Isus, kai prinjeanelas e buti kadea, phendea lengă: „Xançî pateaitorilor, sostar den tume godi kă či lean manŕo?
9 Sa či atearăn? Thai čina či mai anen tumengă godi anda le panji manŕă anda panji mii manuši, thai sode cošuri vazdean?
10 Či anda le efta manŕă anda štar mii manuši, thai sode cošuri vazdean?
11 Sar či atearăn că na poa manŕo phendem tumengă? Ta phendem tumengă te arakhăn tume andoa xumer le Fariseiengo thai le Saducheiengo?
12 Atunčeara atearde on kă či phendeasas lengă te arakhăn pe andoa xumer le manŕăhko, ta andoa sîkaimos le Fariseiengo thai le Saducheiengo.
O Isus pe phuw la Čezeareati le Filiposti.
13 O Isus avilo ande le riga la Čezareiakă le Filiposti, thai pušlea Pehkă jenen: „Kon phenen le manuši kă sîm Me, o Šeau le manušehko?”
14 On phendine: „Iekh phenen kă san o Ioan o Bolditorii; aver: o Ieremia, or iekh anda le prooročea.”
15 „Ta tume”, phendea lengă O, „kon phenen kă sîm?”
16 O Simon Petru, čeačio phendimos, phendea Lehkă: „Tu san o Kristoso, o Šeau le Devllehko kolehko le juvindehko!”
17 O Isus lea pale o divano, thai phendea: „Baxtalo tutar, Simone, o šeau le Ioanahko; anda kă na o mas thai o rat sîkadea tukă e buti kadea, ta o Dadd Muŕo kai sî andel čeruri.
18 Thai Me phenau tukă: „tu san o Petru, thai pe kadoa baŕ vazdaua e khăngări Mîŕî, thai le udara le Thanehkă le mullengă našti kărăna lakă khanči.
19 Daua tu le tei le Thagarimahkă le čerurengă, thai orso phandesa pe phuw, avela phanglo ande le čerurea, thai orso pîtărăsa pe phuw, avela pîtărdo andel čerurea.”
20 Atunčeara mothodea Pehkă jenengă te na mothon khanikahkă kă o sî o Kristoso.
O Isus vestil e patima thai o merimos Lehko.
21 Dă atunčeara întea o Isus lea te mothol Pehkă jenengă kă O trăbul te jeal ando Ierusalimo, te pătimil but anda e rig le phurăndi, anda e rig le rašandi le mai bară, thai anda e rig le zakonurendi; kă sî te avel mudardo, thai kă o trito des sî te uštel.
22 O Petro lea Les rigate, thai lea te xalpe Lesa, phendindoi: „Te arakhăl Tu o Dell, Raia! Te na kărdeol pe Tukă kadea vareso!”
23 Ta o Isus amboldea pe, thai phendea le Petrohkă: „Pala Mande, Bengîna: tu san khă baŕ lopînzîmahko anda Mande! Kă le gînduri tiră nai le gînduri le Devllehkă, ta sî gînduri le manušengă!”
24 Atunčeara o Isus phendea Pehkă jenengă: „Kana kamel varekon te avel pala Mande, te šudelpe pestar, te lel pehko trušul, thai te avel pala Mande.
25 Anda kă orkon kamela te skăpil pesti čivava, xasarălala; ta orkon xasarăla pesti čivava anda Mande, arakhălala.
26 Thai so valoso sî khă manušes te avel les sa e lumea, te xasarăla pehko sufleto? Or, so dela khă manuši andoa paruglimos pehkă sufletohko?
27 Kă o Šeau le manušehko sî te avel ande slava le Daddesti Lesti, le înjerença Pehkă; thai atunčeara potinela orsavekă pala so kărdeas.
28 Čeačimasa phenau tumengă kă iekh anda savença bešeau koče či zumavena o merimos ji kana či dikhăna le Šeaves le manušehkărăs avindoi anda Pehko Thagarimos.”
Ăl nișan le ghesenghe. O aluato le fariseengo. E mărturia le Petroschi. O anunțo le Pătimengo. Sar te gias pala o Hristoso.
1 Pașîndos ăl fariseia hai ăl saducheia te ispitin‐Les mangle Lesche, te sicavel ăc nișan opral and‐o cero. 2 Ta Ou boldea hai phendea‐lenghe: Cana cherdol reat, phenen: Tehara si te avel ghes lacio, că o cero si lolo. 3 Hai dătehara phenen: Aghes si te avel bari barval, că o cero si lolo-mîhnome. Sen cior garade, o ceri gianen te judechin, ta ăl nișan cai si te aven ni daștin. 4 Neamo vicleano hai mahrime manghel ăc nișan, ta ni dela‐pe les aver nișan, numa o nișan le Ionasco. Hai muchlindos‐les, teleardea. 5 Lesche ucenicea avindos părdal o pai, bistarde te len marne. 6 Hai o Iisus phendea‐lenghe: Len goghi te garadion catar o aluato le fariseengo hai le saducheengo. 7 Hai on gîndinas‐pe andă peste hai phenenas: Cadaia că ni lileam marno. 8 Ta o Iisus, cai pringianelas so gîndin, phendea: So godisaren andă tumende, cadea țîra pachiamos, si tumen că ni lilen marno? 9 Sa ni hachiaren, hai nici ni aven tumenghe goghi catar c‐ăl pangi marne, c‐ăl pangi mii manuș, hai cabor tîrne lilen? 10 Nici ăl efta marnendar ăl ștar mii manușa hai cabor tîrne lilen? 11 Sar ta ni hachiaren că na and‐o marno phendem tumenghe? Hai te garadion catar o aluato le fariseengo hai le saducheengo. 12 Atunci hachiarde că ni phendea‐lenghe te garadion catar o aluato le marnesco, numa catar o sicaimos la fariseengo hai le saducheengo. 13 Hai avindos o Iisus and‐ăl thana e Cezareea le Filiposchi, pușlea Pe ucenicen cadea:
Con phenen ăl manuș că sem Me, o Ciao le Manușăsco? 14 Hai on bolde‐Les: Niște manuș phenen o Ioano o Bolitori, aver o Ilia, aver o Ieremia or ech and‐ăl proorocea. 15 Hai Ou phendea‐lenghe: Ta tume con phenen că sem? 16 Boldindos, o Simon Petro phendea: Tu san o Hristoso, o Ciao le Devlesco o giungado. 17 O Iisus boldea hai phendea: Mișto tutar Simone, ciao le Ionasco, că na o corpo hai o rat cherde te gianes cadai buchi, numa Muro Dad cai si opre and‐o cero. 18 Hai Me phenau tuche că tu san o Petro, hai pă cadaua bar vazdaua Mîrî Cangheri hai ăl udara le iadosche ni biruina‐la. 19 Tut daua‐tu ăl chei le thagarimasche and‐o cero, hai orso phandesa pe phuî avela phanglo i and‐o cero, hai orso deschearesa pe phuî avela descheardo i and‐o cero. 20 Atunci poruncisardea Pe ucenicenghe te na phenen canicasche că Ou si o Hristoso. 21 Dă othar astardea o Iisus te sicavel Pe ucenicenghe că Ou trăbuil te gial c‐o Ierusalimo, te pătimil but catar ăl phure hai ăl rașaia hai ăl sicadine hai te avel mundardo, hai c‐ăl trin ghesa te giuvindol. 22 Ta o Petro lea‐Les and‐ăc rig hai astardea te mustrol‐Les, phenindos‐Lesche: Avel‐tu mila Tutar, te na areses te cheren‐Tuche cadea. 23 Hai Ou boldea hai phendea le Petrosche: Nach pala Mîră, zeia bengana. Tu san Manghe ăc pedeca, tu ni gîndis c‐ăl buchea le Devlesche, numa c‐ăl buchea le manușănghe. 24 Atunci o Iisus phendea Pe ucenicenghe: Cana camel da coniva te avel pala Mande, te ciudel‐pe pestar, te lel pio trușul hai te avel pala Mande. 25 Că sao camela te hastral pio ghi, hasarela‐le, hai sao hasarela pio ghi anda Mande, va lela‐le parpale. 26 Că so si and‐ăc manuș te lel sauără lume hai te hasarel pesco ghi? Or so delas o manuș and‐o than pesco ghi? 27 Că o Ciao le Manușăsco si te avel and‐o barimos Lesche Dadesco, Lesche îngerența; atunci pochinela fie saves pala so cherdea. 28 Ceaces phenau‐tumenghe: Si manuș cai beșăn acana cathe cai nai te dichen o merimos, gi cai ni dichena le Ciaves le Manușăsco avindos andă Pio thagarimos.