Sar te avel e juwli ande le tidimata.
1 Ušteaven pel urme mîŕă, kă sar i me ušteavau pel urme le Krsistosohkă.
2 Lăudi tume kă ande sal dičimata anen tumengă godi mandar, thai kă nikrăn le sîkaimata orta sar dem tumengă le.
3 Ta kamau te jeanen kă o Kristoso sî o Šero or save muršehko; thai kă o murši sî o šero la juwleako, thai kă o Dell sî o šero le Kristosohko.
4 Orsao murši kai rudil pe or prooročil le šerăsa garado, del lajau pehkă Šerăhkă.
5 Avervaresar, orsavi juwli, kai rudil pe or prooročil le šerăsa bidikhlehko, del lajau pehkă šerăhkă, anda kă sî sar iekh kai sî ranglo lako šero.
6 Kana khă juwli či thol dikhlo ando šero, i te mîŕavel pe! Ta, kana sî lajeau anda khă juwli te avel mîŕadi or ŕangli, te thol dikhlo ando šero.
7 O murši nai unjile te garavel pehko šero, anda kă o sî o tipo thai e slava le Devllesti, ta kana e juwli sî e slava lakă muršesti.
8 Ande čeačimaste, na o murši sas lino andai juwli, ta e juwli andoa murši;
9 ta na o murši sas kărdo andai juwli, ta e juwli andoa murši.
10 Anda kodea e juwli, pala le înjeri, trăbul te avela po šero khă sămno lakă stăpînimahko.
11 Sakadea, ando Rai, e juwli nai bi muršehko, či o murši nai bi juwleako.
12 Kă kana e juwli sî andoa murši, sa kadea i o murši andai juwli, thai sa sî katoa Dell.
13 Krisînin tume korkoŕo: sî mišto kakh juwli te rudil pe le Devllehkă bi dikhlehko?
14 Či sîkavel tume orta so sî pe lumea kă sî lajeau anda khă murši te phiravel le ball lunji,
15 ta kana anda khă juwli sî khă kučimos te phiravel le ball lunji? Anda kă le ball sas lakă dine sar khă dikhlo le šerăhko.
16 Kana varekahkă sî lehkă drago e čiungar le orbendi, amen nai ame kadea vareso thai či le Khăngărean le Devllehkă.
Poa xabelareateako le Raiehko.
17 Dau tume kadala sîkaimata, ta či lăudi tume anda kă tiden tume saoŕă na kaste kărdeon mai laše, ta kaste kărdeon mai jungale.
18 Mai anglal dă sa, ašunau kă atunčeara kana aven koa tidimos, maškar tumende sî čiungara. Thai andekh rig pateau,
19 kă trăbul te avel i partide maškar tumende, kaste anklel kai lumina kola arakhadine laše.
20 Kana tiden tume kadea ande kodoa than, nai daštimasa te xan o xabelareateako le Raiehko.
21 Anda kă atunči kana bešen kai skafidi, orsao iuçol pe te lel pehko xabe andino lestar, angloa aver; kadea kă iekh sî bokhalo, ta aver sî mato.
22 So? Nai tume khăra kaste xan thai te pen oče? Or nadikhăn e Khăngări le Devllesti, thai kamen te kărăn lajavehko kolen kai naile khanči? So te phenau tumengă? Te lăudi tume? Ando dičimos kadoa či lăudi tume.
23 Kă lem kata o Rai so sîkadem tume; thai kadea kă, o Rai o Isus, ande reat kai sas bitindo, lea khă manŕo.
24 Thai pala so naisardea le Devllehkă, phaglea les, thai phendea: „Len, xan; kadoa sî o stato Muŕo, kai phadeol anda tumende; te kărăn e buti kadea kana den tume godi pa Mande.”
25 Sa kadea, pala o xabe, lea o taxtai, thai phendea: „Kadoa taxtai sî o phanglimos o neo ando rat Muŕo; te kărăn e buti kadea kana anen tumengă godi Mandar, or sodivar pena anda leste.”
26 Andakă, orsodivar xan andoa manŕo kadoa thai pen andoa taxtai kadoa, vestin o mullimos le Raiehko, ji kana avela O.
27 Anda kodea, orkon xal o manŕo kadoa or pel o taxtai le Raiehko ando tipo nevreniko, avela došalo le statostar thai le ratestar le Raiehkărăstar.
28 Or sao te lel pe sama peste, thai kadea te xal andoa manŕo kadoa thai te pel andoa taxtai kadoa.
29 Kă kon xal thai pel, xal thai pel e kris pesti, kana či lel sama koa stato le Raiehko.
30 Anda e doši kadea sî maškar tumende but bizorako thai nasfale, thai na xançî soven.
31 Te krisînisauasa korkoŕo, nahkă avas krisînime.
32 Ta kana sam krisînime, sam došalde le Raiestar, kaste na avs došalde ăkhdata la lumeasa.
33 Kadeadar, mîŕă phral, kana tiden tume te xan, ajukrăn tume iekh avrăn.
34 Kana sî varekahkă bokh, te xal khără, kaste na tiden tume pe krisate. Le kolaver butea lašarauale kana avaua.