O tidimos le buteango le phralengă.
1 Ande so dičiol pe o tidimos le buteango anda le sfinçea, te kărăn i tume sar lašardem le Khăngăreangă anda e Galaçia.
2 Ando des anglal le kurkăhko, orsao anda tumende te thol rigate khără so daštila, pala lehko bravalimos, kaste na tiden pe le butea kana avaua me.
3 Thai kana avaua, tradaua zakonurença kolen kai dinaua le vrenikuri, kaste nigrăn tumară pativa ando Ierusalimo.
4 Te kărăla te jeau i me, jeana mança.
5 Tumende sî te avau pala so nakhaua andai Mačedonia, kă andai Mačedonia nakhaua.
6 Daštiua te atărdiuau tumendar, or falpe te iwendi tumende, ta pala kodea te aven mança oče kai avela te jeau.
7 Ande data kadea či kamau te dikhau tume kadea ando nakhlimos, ta çîrdau ajukărimos te mai ašeau tumença vareso čiro, kana kamela o Rai.
8 Mai ašeaua varesar ando Efeso ji kal Rusale,
9 Kă pîtărdi'lo mangă koče khă udar baro thai buflo, thai sî but dušmaia.
10 Kana arăsăla o Timotei, avel tume grija te arăsăl bi darako tumende; kă o sî astardo i sar mande ande buti le Raiesti.
11 Khonikh ta te na dikhăl jungales pe leste. Te nakhaven les pačeasa, te avel mande, anda kă ajukrau les le phralença.
12 Sode pa o phral o Apolo, rudisardem les but te avel tumende le phralença, ta či kamblea čidăfel te avel akana; avela kana avela les avimos.
Phendimata.
13 Len sama, aven zurale ando pateaimos, aven manuši, zureaon!
14 Sa so kărăn, kărăn kamblimasa!
15 Mai iekh phendimos, phralale. Prinjeanen o khăr le stefanohko; jeanen kă o sas o mai anglal rodo le Axaiehko, thai kă thodea pe ku sa ando kandimos le sfinçăngo.
16 Aven i tume dabadikhlimasa kadale manušengă thai sakoiekhăhkă kai kandel ande buti thai xodinil pe.
17 Bukuri ma andoa avimos le Štefanohko, le Fortunatohko thai le Axaikohkă; on pherdine so nas kărdo anda tumari rig,
18 kă šudrearde muro duxo thai tumaro. Te jeanen kadea te den pativ kadalendar manuši.
Phendimata sastimatahkă.
19 Le Khăngărea andai Asia, traden tumengă sastimos. O Akuila thai Prisčila, andekhthan la Khăngăreasa anda lako khăr, traden tumengă but sastimos ando Rai.
20 Sa le phral traden tumengă sastimos. Phenen tumengă sastimos iekh avrăngă khă čiumidimasa sfînto.
21 Le phendimata le sastimatahkă sî ramome orta mîŕă vastesa: o Pavelo.
22 Kana či kamel varekon amară Raies le Isus Kristosos, te avel dinoarman! „Maranata” (O Rai amaro avel!)
23 O xaro le Raiehko le Isus Kristosohko te avel tumença.
24 O kamblimos muŕo sî tumença saoŕănça ando Kristoso Isuso. Amino.