O mardimos le Amoniçănça.
1 Pala kodea, o thagar le šeavengo le Amonohkă mullo, thai ande lehko than raisardea lehko šeau o Xanuno.
2 O Davido phendea: „Sîkavaua lašimos le Xanunohkă, o šeau le Naxašohko, sar sîkadea i lehko dadd angla mande.” Thai o Davido tradea pehkă kanditoren te den les lašimos anda o mullimos lehkă daddehko. Kana arăsline le kanditorea le Davidohkă ando čem le šeavengo le Amonohkă,
3 le šerălebară le šeavengă le Amonohkă phendine pehkă stăpînohkă le Xanunohkă: „Pateas kă o Davido tradel tukă manuši kaste den tu lašimos, kaste den pativ te daddes? Or kaste prinjeanen thai te roden e četatea, kaste xasarăn la tradel o pehkă kanditoren tute?”
4 Atunčera o Xanuno lea le kanditoren le Davidohkărăn, šindea lendi šor pa dopašeste, thai šindea lengă çoale pa dopašeste ji kal prašave. Pala kodea dea le drom.
5 O Davido, phendindoi lehkă pai buti kadea, tradea varesar manuši angla lende, kă le manuši kadala sas but mardine khălimahkă; thai o thagar phendea te phenel lengă: „Ašen ando Ierixono ji kana bareola tumari šor, thai pala kodea te ambolden tume.”
6 Le šeave le Amonohkă, dikhlindoi kă kărdilesas bidabadikhline le Davidostar, tomnisarde biši mii pedeštrea katal Sirienea andao Bet-Rexob thai katal Sirienea anda e Çoba, ăkh mia manuši kata o thagar anda Maaka, thai dešudui mii manuši katal manuši andoa Tob.
7 Koa ašundimos kadoa, o Davido tradea pa lende le Ioabas thai sai oštirea, dăsar manuši zurale.
8 Le šeave le Amonohkă ankăste, thai lašarde pe andel širurea le mardimahkă koa šutimos le udarăhko; le Sirienea andai Çoba thai andoa Rexob thai le manuši andoa Tob thai andai Maaka, sas dur ando islazo.
9 O Ioab dikhlea kă sas les te marăl pe i anglal thai i palal. Alosardea atunčeara anda sal alosarde le Israelohkă khă kîrdo, kai thodea les pal Sirienea;
10 thai thodea tala o mothodimos pehkă phralehko o Abišai so mai ašilea andoa poporo, kaste nikrăl kolin le šeavengă le Amonohkă.
11 O phendea: „Kana le Sirienea avena mai zurale sar mande, te aves ando kandimos muŕo; thai kana le šeave le Amonohkă avena mai zurale sar tute, avua me te kandau tu.
12 Av, zuralo, thai te sîkavas ame pherdo muršimos andoa poporo amaro thai andal četăçi le Devllehkă amarăhkă; thai o Rai te kărăl so pateala!”
13 O Ioab le poporosa lehko gălo anglo mardimos pal Sirienea, thai on linela te našen angla leste.
14 Thai kana dikhle le šeave le Amonohkă, kă le Sirienea linesas la te našen, našle i on angloa Abišai, thai šute pe ande četatea. O Ioab teleardea katal šeave le Amonohkă, thai amboldi'lo ando Ierusalimo.
15 Le Sirienea, dikhlindoi kă sas mardine le Israelostar, tidine pehkă zora.
16 O Xadarazero tradea palal Sirienea kai sas pe kolaver rig le Nanilašosti; thai avile ando Xelam, anglal le Šobakosa, o šerobaro le Xadarezorohko.
17 Dine ašundimos le Davidohkă kai tidea soa Israelo, nakhline o Iordano, thai avile ando Xelam: le Sirienea lašarde pe thai ankăste angloa Davido, thai line te marăn pe lesa.
18 Ta le Sirienea našle angloa Israelo. Thai o Davido šindea lengă efta šella grast urdonehkă phirimahkă thai štarvardeši mii ankăstepelgrast; maladea i le šerăbarăs la oštireako le Šabakos, kai mullo po than.
19 Sa le thagar tala o Xadarezero, dikhlindoi pe mardine le Israelostar, dine pe tala lehko punŕo. Thai le Sirienea či mai zumade te kanden le šeaven le Amonohkărăn.