1 „Aven, te amboldas ame koa Rai! Kă O phaŕadeame, ta sa O sasterăla ame; O maladea ame, ta sa O phandela amară šindimata.
2 O dela ame pale e čivava ande dui des; o trito des ušteavela ame, thai traisarasa angla Leste.
3 Te prinjeanas, te rodas te prinjeanas le Raies! Kă O dičiol pe sar le zorea le droboimahkă, thai avela amende sar khă brîšind, sar o brîšind le anglamillaiehko, kai tindearăl e phuw!”
4 So te kărau tukă, Efraime? So te kărau tukă, Iudo? E dar le Devllesti tumari sî sar o noro le droboimahko, thai sar e iasflečeresti kai nakhăl iekhatar.
5 Andakodea bičiuisaraua le andal prooročea, mudaraua le andal divanuri Mîŕă mohkă, thai le krisa Mîŕă străfeana sar e lumina!
6 Kă lašimos kamau, na jertfe, thai prinjeandimos le Devllestar mai but, dăsar phabarimata dă sa!
7 Ta on ušteadine o phanglimos, sar orsao manuši kai sî; thai nas Mangă pateamne atunčea.
8 O Galaado sî khă četatea le bikrisînalendi, pherdi andal urme le ratehkă!
9 O kîrdo le rašango sî sar khă kîrdo le čiorăngo, kai bešen koa arakhaimos, kărindoi mudardimata po drom le Sixemohko; e, den pe kal bibaxtalimata.
10 Ando khăr le Israelohko dikhlem butea daraimahkă: oče o Efraimo kurvăril, o Israelo maril pe.
11 Thai tukă, Iuda, sî tukă lašardino khă sečerišo, kana anaua parpale le roben le mardimahkărăn Mîŕă poporohkă!