1 Tho e šing ando mui! O dušmano avel sar khă vulturo poa Khăr le Raiehko! Kă ušteadine o phanglimos Muŕo, thai bezexarde pai Kris Mîŕî.
2 Atunči çîpisarăna karing Mande: „Devlla, ame Prinjeanas Tu, ame, o Israelo!”
3 O Israelo šudea o lašimos la skîrbasa; anda kodea o dušmano phirăla pala leste.
4 Thodine thagar bi Mîŕă mothodimasa, thai šerăbară bi Mîŕă jeanglimasa, kărdine idolea andoa rup thai o sumnakai lengo: anda kodea avena xasardine.
5 O guruwiç tiro sî khă skîrba, Samario! E xolli Mîŕî astardi'li pa lende! Ji kana či kamena on te nikrăn pe ujearde?
6 O idolo kadoa avel andoa Israelo, khă buteari kărdea les, thai nai Dell. Andakodea, o guruwiçî la Samariako avela kărdino kotora!
7 Andakă thodine bravall, tidena barobrîšind. Či bareola lengă khă spiko diwehko; so lulludearăla, či dela aŕo, thai kana dela, xana les le străinea.
8 O Israelo sî xasardino! Akana on arăsline maškar le neamurea sar khă vaso bikučimahko.
9 Kă găline ande Asiria, sar khă čiuši văšuno kai phirăl anapoda. O Efraimo dea pativa kaste avel les amal!
10 Orta kana on den pativa le neamurengă, sa mekauama pa lende, kaste atărdearăn anda xançî čiro te mai makhăn vokh thagar thai raimata.
11 Kă o Efraimo vazdea but altare kaste bezexarăl, thai le altare kadala kărdine les te perăl ande bezex.
12 Orta kana ramo lehkă sa le mothodimata Mîŕa Krisakă, varesar on sî dikhline sar vareso străino.
13 On denšuri le jiwine kai anen Mangă le, thai lengo mas xan les: andakodea o Rai či lel le! Akana o Rai anel Pehkă godi lengă bikrisango, thai došavela lengă bezexa: amboldena pe ando Ejipto!
14 Kă o Israelo bîstărdea Koles kai kărdea les, thai vazdea lehkă palaturea, thai o Iuda buteardea le četăçi le zureardea, anda kodea tradaua iag andel četăçi lengă, thai phabarăla lengă palate.