1 Ušti ta, ušti ta! xureau tu ando kučimos tiro, Sioane! Tho tukă le çoale le desăhkăbarehkă, Ierusalimona, četatea sfînto! Kă či mai šola pe ande tute či khă bišindoroata or marime.
2 Činosar e poši pa tute, ušti ta, thai beši ando šero le kokalengo, Ierusalime! Pîtăr te phanglimata katai koŕ, šei, roabă le Sionosti!
3 Kă kadea delduma o Rai: „Bi podindimahko sanas bitindine, thai ci avena tindineparpale po potindimos rupehko.”
4 Kă kadea delduma o Rai o Dell: „Averdata o poporo Muŕo ulisto te bešel anda khă čiro ando Ejipto; pala kodea o Asiriano meklea pe pa leste bi čeačimahko.
5 Thai akana, so sî te kărau koče – phenel o Rai – thai sode sî o desoro dă baro sî prasaime Muŕo Anau.
6 Anda kodea o poporo Muŕo prinjeanela Muŕo Anau; anda kodea jeanela, ando des kodoa, kă Me dauduma thai phenau: „Dikta Ma!”
7 So šukar sî pel baŕlebară, le pînŕă kolehkă kai anel phendimata laše, kai vestil e pačea, le pînŕă kolehkă kai anel phendimata laše, kai vestil o skăpimos! Le pînŕă kolehkă kai phenel le Sionohkă: „O Dell tiro thagaril!”
8 „Dikta, o mui le străjerengo ašundeol pe; on vazden o mui, thai çîpin saoŕă vesălimastar; kă dikhăn pehkă iakhănça sar amboldel pe O Rai ando Siono.
9 Anklen sa le çîpimatănça le bukurimahkărănça, peradimata le Ierusalimohkă! Kă o Rai răzgăil Pehkă poporos, thai potinel le Ierusalimos.
10 O Rai sîkavel Pehko vast kukoa o sfînto, angla sal neamuri; thai sa le riga la phuweakă dikhăna o skăpimos amară Devllehko.”
11 „Jeantar, jeantar, anklen andoa Babilono! Na azban tume khančestar marime! Anklen andoa maškar lehko! Ujearăn tume, kola kai phiraven le vasuri le Devllehkă!
12 Na anklen iekharimasa, na telearăn ando našaimos; kă o Rai anklela tumengă anglal thai o Dell le Israelohko šinela tumengă o drom.” E Făptura thai e buti le Robosti le Raiehko.
13 Dikta, o Robo Muŕo jealaangle; Anklela, vazdela Pe, thai učiola Pe but opră.
14 Pala sar anda but sas khă buti daraimasti – kaditi dă dukhadino sas Lehko mui, thai kaditi dă but či amealas Lehko ameazaimos le šavença le manušengărănça –
15 sa kadea, anda but popoare avela khă buti bukurimasti; angla Leste le thagar phandavena o mui, kă dikhăna so či mai phendeasas pe lengă, thai ašunena so či mai ašundesas.