Armaia thai robimos.
1 O Divano le Raiehko dea mangă duma kadea:
2 „Te na les tukă romni, thai te na avel tu ando than kadoa či šave či šeia!
3 Kă kadea delduma o Rai pal šave thai le šeia kai kărdeona pe ando than kadoa, pal deia kai kărăna, thai pal dadda kai dena kărdimos ando čem kadoa:
4 merăna perade le nasfalimastar le jungalestar. Khonikh či rovela le, čina či praxola le, thai avena sar khă gunoi pe phuw; merăna sabiatar thai bokhatar; thai le staturi lengă le mulle kandena sar pravardimos le čirikleangă le čerehkă thai le jiwinengă la phuweakă.”
5 „Kă kadea delduma o Rai: „Te na šostu ande či khă khăr roimahko, te na roves ande late, thai čina te na roves lença, kă lem Mangă parpale kata kadoa poporo e pačea Mîŕî, phenel o Rai, o lašimos thai o meklimos Muŕo.
6 Thai bară thai çînoră, saoŕă merăna ando čem kadoa, thai či avena praxome: khonikh či rovela le, khonikh či kărălas pehkă šindimata andai rig lendi, thai či randela pe anda lende.
7 Khonikh či thola lengă e skafidi ando čiro le roimahko kaste răzgăile anda kukoa o mullo; thai khonikh či tinzola lengă o tahtai le răzgăimahko anda lehko dadd or anda lesti dei.
8 Te na šostu ande či khă khăr kai xalpe thai pelpe, kaste thos tu lença te xas thai te pes.”
9 „Kă kadea delduma o Rai le oštirengo, o Dell le Israelohko: „Dikta, kăraua te atărdeol ando than kadoa, tala tumară iakha thai andel des tumară, le çîpimata le bukurimahkă thai le çîpimata le vesălimahkă, le dilabaimata le tărnehkă thai le dilabaimata la tărneakă.”
10 „Kana vestisarăna le poporohkă kadalehkă sa kadala butea, on phenena tukă: „Anda soste daravel ame o Rai sa kadale bară bibaxtalimatănça? So bikris thai so bezex kărdeam poa Rai, o Dell amaro?”
11 „Atunčeara te deleanglal: „Tumară dadda mekle Ma, phenel o Rai, găline pala aver devla, kandele thai bandi'le angla lende; ta Man mekline Ma, thai či arakhline Mîŕî Kris!
12 Thai tume kărdean i mai nasul dă sar tumară dadda; kă dikta kă sakoiekh phirăn pala le tradimata le jungale tumară illehkă, thai či ašunen Ma.
13 Anda kodea, mutiua tume andoa čem kadoa ande khă čem, sao či prinjeandean les, či tume, či tumară dadda; thai oče, kandena avră devlengă, des thai reat, kă či iertiua tume!”
14 „Anda kodea dikta, aven des, phenel o Rai, kana či mai phenela pe: „Juwindo sî o Rai, kai ankaladea andoa čem le Ejiptohko le šaven le Israelohkărăn!”
15 Ta phenela pe: „Juwindo sî o Rai, kai ankaladea le šaven le Israelohkărăn andoa čem katar avelereat thai anda sal čema kai našadesas le!” Kă anaua le parpale ande lengo čem, kai demas les lengă daddengă.”
16 „Dikta, tradau khă butimos mašarengo, phenel o Rai, thai astarăna le; thai pala kodea, tradaua khă butearimos văšarengă, thai vînola le pe sal baŕlebară thai pe sal pleaia, thai ando phaŕadimos le kotorălebaŕăngo.
17 Kă le iakha Mîŕă sî limasa godi ka sa lengă droma; on nai garadine angla o Mui Muŕo, thai e bikris lendi či bešel garadi Mîŕă dikhlimatăngo.
18 Anda kodea potinaua le mai anglal duarăs e bikris thai o bezex lengo, anda kă marisarde Muŕo čem, anda kă pherdine Muŕo mandimos le staturença mulle le jertfengă andine le idolengă lengă thai lengă prikăjimatănça.
19 Raia, e zor, e četăçuia thai o skăpimos muŕo ando des le kăznimahko! Le neamurea avena Tute katai rig la phuweati, thai phenena: „Amară dadda či line mandimos dă sar xoxaimos, idolea khančehkă, kai nai či khă kandimahkă!
20 Sar daštil o manuši te kărăl pehkă devla, kai nai devla?”
21 Anda kodea dikta kă sîkavau lengă, ande data kadea, thai kărau le te jeanen e zor thai o zurallimos Muŕo; thai prinjeanena kă o Anau Muŕo sî o Rai.”