1 „Phirăn sa le uliçi le Ierusalimohkă, dikhăn ta, pušen ta thai roden andel piaçuri, kana arakhadeol khă manuši, kana sî vo iekh kai te kărăl so sî čeačio, kai te nikrăl le čeačimastar, thai iertiua o Ierusalimo.
2 Orta kana phenen: „Juwindo sî o Rai!” on solaxan bangăs.
3 „Raia, či dikhăn Te iakha o čeačimos? Tu malaves le thai on či atearăn khanči; xasarăsle, thai či kamen te len sîkaimos; len khă ameaimos mai zurallo sar o kotorlebaŕăhko, či kamen te amblden pe Tute.”
4 „Me phenauas: „Dă sar kola le çînoŕă sî kadea; on kărăn buti bi godeako, anda kă či prinjeanen o drom le Raiehko, e Kris lengă Devllesti!
5 Jeau kadeadar ka kola le bară, thai daua lengă duma; kă on prinjeanen o drom le Raiehko, e Kris lengă Devllesti!” „Ta saoŕă linčeardine o xamo, thai phagle le phanglimata.
6 Anda kodea mudarălle o leo andoa văši, thai xasarăle o ruw andai pustia. Bešel koa arakhaimos o pardoso angla lengă četăçi: sa kola kai anklena anda lende avena phaŕadine; kă le bikrisa lengă sî mai but, lengă došalimata butile!”
7 „Sar te ierti tu? – phenel o Rai – Le šave tiră mekle Ma, thai solaxan pel devla kai nai le dii. Thai pala so lem lengă solaxaimata, den pe kai butkurvăria, thai prasten la gomilasa ando khăr la kurvako!
8 Sar varesar grast mišto pravarde, kai našen orde thai întea, sakogodi armintil pala e romni pehkă pašesti.”
9 „Te na došavau Me kadala butea, phenel o Rai, te na vazdau Ma Me pa kadea khă poporo?”
10 „Anklen ta pel zîduri lakă thai peraven, ta na xasarăn sa! Len lakă butučea kadala, kai nai le Raiehkă!
11 Kă o khăr le Israelohko thai o khăr le Iudahko sas Mangă bipateamne, phenel o Rai.”
12 „On na prinjeanen le Raies thai phenen: „Nai o! Thai či avela o bibaxtalimos pa amende, či dikhasa či e sabia thai či o bokhalimos.
13 Le prooročea sî bravall, thai na o Dell delduma anda lende. Kadea te kărdeol pe lengă i lengă!”
14 „Andakodea kadea delduma o Rai, o Dell le oštirengo: „Anda kă phendean e buti kadea, dikta, o Divano Muŕo kărau les iag ande teo mui, thai o poporo kadoa kašt, kaste phabarăle e iag kadea.
15 Dikta, anau dă dural khă neamo pa tumende, khăr le Israelohko, – phenel o Rai – khă neamo zurallo, khă neamo purano, khă neamo savesti šib či prinjeanes la, thai savehkă orbe či atearăs le.
16 E tolba lesti le săjeçănça sî sar khă thanmullimahko pîtărdo; sa sî varesar zurallimahkă.
17 O xala teo tidimos thai o manŕo, xala te šaven thai te šeian, xala te bakrean thai le guruwen, xala ti răz thai o smoitino; nakhavela andai sabia te četăçi le zureardea, ande save pateas tu.
18 Ta, i andel des kodola, phenel o Rai, – či xasaraua tume dă sa.
19 Kana pušena atunčeara: „Anda soste kărdean amengă sa kadala Raia, o Dell amaro? „„Kadea desaleanglal: „Pala sar tume meklean Ma thai kanglean avră devlengă străinea ande tumaro čem, sa kadea, akana kandena kal străinea ande khă čem kai nai tumaro!”
20 „Phenen e buti kadea le khărăhkă le Iakovohkă, vestisarăn les ando Iuda, thai phenen:
21 „Ašunen e buti kadea, poporo bi godeako, kai sî les iakha ta či dikhăl, kan ta či ašunel!
22 „Či kamen te daran Mandar, phenel o Rai, či kamen te isdran angla Mande?” Me thodem la mareakă sar gor e tišai, gor vešniko, kai či trăbul te nakhăles. Thai orta lakă valurea te xolleaona, varesar sî bizoralimahko; xunxuin, ta či nakhăn les.
23 Ta o poporo kadoa sî les khă illo biatărdimahko thai vazdino; mardeol pe, thai jealtar,
24 thai či phenen ande pehko illo: „Te daras le Raiestar, le Devllestar amarăstar, kai del brîšind koa čiro, brîšind anglaimahko thai dureardo, thai garavel amengă le kurkă mothodine andoa tidimos.
25 „Anadai doši le bikrisăngo tumarăngo nai than kadale lašardimatăngă, le bezexa tumară lipson tume kadale lašimatăngo.
26 Kă ande Muŕo poporo sî manuši nasulimatahkă; on pîndin sar o čiriklearii, kai tinzol phalea, tinzon astarimata, thai astarăn manuši.
27 Sar pherdeol khă kolivia čirikleandar, kadea pherdeol lengă khăra ando čiordimos; kadea arăsăn on zuralle thai bravale.
28 Thuleon, străfean thulimastar; nakhaven orsavi măsura ando nasul, či arakhăn e doši, e zan le biddadehko, kaste jeal pe lengtă mišto, či kărăn čeačimos kolengă kai nai le.
29 Te na došavau Me kadala butea, phenel o Rai, te na vazdau Ma Me pe khă kadea poporo?”
30 „Bară butea, prikăjimata buteangă kărdeon ando čem.
31 Le prooročea prooročin bičeačimata, le raša stăpînin lengă kandimasa, thai Mîŕă poporohkă čeaileon les kadala butea. Ta so kărăna mai palal?