O Beng došavel le Iovos.
1 Le šave le Devllehkă avile ande khă des ta thodine pe angloa Rai. Thai avilo i o Beng ande lengo maškar ta thodea pe angloa Rai.
2 O Rai phendea le Bengăhkă: „Katar aves?” Thai o Beng deanglal le Raies: „Kata o rodimos la phuweako thai kata o phirimos kai kărdem les pe late.”
3 O Rai phendea le Bengăhkă: „Dikhlean Mîŕă robos le Iovos? Nai khonikh sar leste pe phuw. O sî khă manuši bi bezexako thai ujo koa duxo. O daral le Devllestar, thai delperigate katoa nasul. O nikrăl pe zurallo ande pehko bibezexalimos, thai tu phenes Mangă te xasarau les bi došako.”
4 Thai o Beng deanglal le Raies: „Morči anda morčeate! O manuši del sa so sî les anda pesti čivava.
5 Ta le thai tinzosarta Teo vast thai azba Tu le kokalendar thai lehkă masăstar, thai sîm pateamno kă dela tu armaia anglal.”
6 Thai o Rai phendea le Satanohkă: „Dikta, dau tukă les po vast: dăsar mekh lesti čivava.”
7 Thai o Beng teleardea angloa Rai. Pala kodea maladea le Iovos kha phumneasa jungali, dă andai šulbiça le pînŕăsti ji ando krešteto le šerăhko.
8 Thai o Iov lea khă čiobo te xarondel pe, thai bešlo ando ušar.
9 Lesti romni phendea lehkă: „Tu ašes bimištime ande teo bibezexalimos!
De arman le Devlles, thai mer!”
10 Ta o Iov dealanglal: „Des duma sar khă juwli čealadi. So! las kata o Dell dăsar o mištimos, thai te na las i o nasul?” Ande sa kadala des, o Iov či bezexardea či dă fel lehkă uštença.
Kola trin amal aven koa Iov
11 Trin amal le Iovohkă, o Elifaz andoa Teman, o Bildad andoa Šuax, thai o Çofar andoa Naama, ašundine anda sal bibaxtalimata kai maladinesas les. Dinepeduma thai telearde khăral te jean te roven lehka millatar thai te den les zor.
12 Vazdindoi pehkă iakha dă dural, či mai prinjeande les. Thai vazdine o mui thai ruine. Šinde pehkă raxamea, thai šude phuweasa opral pa pehkă šeră.
13 Thai bešle pe phuw paša leste efta des thai efta reatea, bi te phenen khă orba, kă dikhănas sode dă bari sas lesti dukh.