O dimosduma le Elixuohko.
1 Kadala trin manuši či zumade te mai denanglal le Iovos, anda kă o patealas pe bi došako.
2 Atunčeara astardi'lo xolleatar o Elixu, o šeau le Barašeelehko andoa Buz, andoa čeledo le Ramohko. O astardi'lo xolleatar poa Iov, anda kă phenelas kă sî bi došako angloa Dell.
3 Thai astardi'lo xolleatar pa kola trin prinjeande lehkă, anda kă či arakhănas khanči dimosanglal thai sa došarănas le Iovos.
4 Anda kă len sas le mai but bărši sar leste, o Elixu ajukărdea ji ande leaka kadea, kaste delduma le Iovohkă.
5 Ta, dikhlindoi kă manas či khă dimosanglal andoa mui kadale trine manušengă, o Elixu astardi'lo xolleatar.
6 Thai o Elixu, o šeau le Barašeelohko andoa Buz, lea o divano, thai phendea:
„Me sîm tărno, thai tume san phură:
anda kodea darailem, thai arakhade ma te sîkavau tumengă muŕo gîndo.
7 Me phenauas: „Te delduma o phurimos,
o baro dindimos le băršengo te sîkavel avrăn o xaraimos.”
8 Ta, dăsar, ando manuši, o duxo,
o phurdimos Kolehko Asazurallehko,
9 Na le bărši anen o xaraimos,
na o phurimos anel tu ande starea te krisînis.
10 Dikta sostar phenau: „Ašunen ma!
Phenaua i me muŕo falimos.
11 Ajukărdem o gor le divanurengo tumarăngo,
phirdem pala tumară čeačimata,
o rodimos kai kărdean les le divanurengă le Iovohkă.
12 Dem tume soa limos godeako;
thai diktakă, či iekh anda tumende či čeačeardea les,
či iekh či deamuial lehkă divanuri.
13 Ta te na phenen: „Ande leste ame arakhleam o xaraimos;
dăsar o Dell dašti phandaveles, na khă manuši!”
14 Mangă či deamangăduma orta:
anda kodea me daualesanglal avervaresar sar tumende sa.
15 On daran, či denanglal!
Šindea pe lengo divano!
16 Ajukărdem ji koa gor lengă divanurengă,
ji kana atărdile thai či mai jeangline so te denanglal.
17 Kamau te dauanglal i me koa širo muŕo,
kamau te phenau i me so gîndi.
18 Kă sîm pherdo divanuri,
del ma zor o duxo muŕo andral;
19 o andraimos muŕo sî sar khă moll kai nai la katar te anklel,
sar varesar burdufurea neve, gata te phaŕadeon.
20 Kadeadar dauaduma,
kaste phurdau ando kamimos,
pîtraua mîŕă ušt thai dauanglal.
21 Či rodaua koa sîkadimos,
či čearmakhaua khanikas;
22 kă či jeanau te čeaŕmakhau:
kadeadar, ande khă leaka lela ma o Vazditorii muŕo.