O Iov biajukărdimahko.
1 E bax le manušesti pe phuw sî sar kha kătanati,
thai le des lehkă sî sar khă butearăsti koa des.
2 Sar rovel o robo palai ušal,
sar ajukrăl o buteari pehko potindimos,
3 kadea sî ma i man rig šonendar dukhaimahkă,
thai rig mîŕî sî reatea dukhadimahkă.
4 Sovau, thai phenau:
„Kana ušteaua?
Kana avela o gor la reateako?”
Thai čeailiuau kovleardimatăndar ji kana phaŕadeol o des.
5 O stato pherdeol mangă terme
thai kha koajasa phuwikani,
e morči phaŕol mangă thai pîtărdeol.
6 Ledes mîŕă xurean mai iekhatar sar
e suveika le astarimtoresti,
jeantar thai manai ma či khă ajukărimos!
7 An Tukă godi, Devlla,
kă e čivava mîŕî sî dăsar khă phurdimos!
Le iakha mîŕă či mai dikhăna o baxtalimos.
8 E iakh, kai dikhăl ma, či mai dikhăla ma;
ti iakh rodela ma, thai či mai avaua.
9 Sar phaŕadeol o noro thai nakhăl,
kadea či mai uštela kukoa kai del pe
tele ando Than le mullengo!
10 Či mai amboldela pe ande pehko khăr,
či mai prinjeanela o than ande sao bešelas.
11 Anda kodea nikraua muŕo mui,
thai daua duma ando biujimos mîŕă illehko,
rovaua ando kărtimos mîŕă duxohko.
12 Ta khă marea sîm me, or khă xala mareati,
ta thodean straja angla mande?
13 Kana phenau: „O pato lesnila ma,
o than potolila le dukha,”
14 atunči daraves ma andel sune,
daraves ma andal vedenii.
15 Au! Sahkă kamau mai mišto tidimoskoŕatar,
mai mišto o mullimos dă sar kadala kokala!
16 Či dabadikhau le! … či traiua andel veakuri…
Mekh ma, kă dăsar khă phurdimos sî mîŕî čivava!
17 So sî o manuši, kaste fal Tu kaditi dă but lestar,
kaste les sama lestar,
18 te rodes les ande sako droboimata,
thai te zumaves les ande sako le leakuri?
19 Kana atărdeosa ăkdata te dikhăs ma?
kana desa mekăsa ma te nakhavau muŕo čiungar?
20 Kana bezexardem, so dašti te kărau
Tukă, Arakhaitorii le manušengo?
Anda soste thodean ma çînta le săjeçăngă Tirăngă,
ta arăslem khă pharimos anda mande orta?
21 Anda soste či iertis muŕo bezex,
Thai anda soste či bîstrăs mîŕî bikris?
Kă sovaua ande phuw,
thai kana rodesa ma, či mai avaua!”