O dimosanglal le Iovohko.
1 O Iov lea o divano thai phendea:
2 „Jeanau mišto kă sî kadea.
Thai sar daštila o manuši te ankalavel pehkă čeačimos angla o Dell?
3 Te kamena te xan pe Lesa,
andakh mia butea naština te denanglal ka iekh korkoŕo.
4 Lehko sî o xaraimos, thai o asazurallimos;
kon daštila te kontril pe Lesa bi te avel došaldo?
5 O mutil andakhdata le baŕbară,
thai delemuial ande Pesti xolli.
6 Izdravel e phuw anda e temelia lati,
ta mištin lakă tille.
7 Mothol le khamehkă, thai o kham či mai lulludearăl;
thai nikrăl le čeraia tala Lesti bokolli.
8 Dăsar O tinzol le čerurii,
thai phirăl pel učimata la mareakă.
9 O kărdea o Riši o baro, o lučeafăro la reateako thai le Raliçelea,
thai le čeraia anda le phuwea kataravelodes.
10 O kărăl butea bară thai biatearimahkă,
šukarimata bi dindimahkă.
11 Dikta, O nakhăl paša mande, thai či dikhau Les,
jealtar, thai či dikau Les.
12 Kana azbal O, kon dašti atărdeară Les?
Kon phenela Lehkă: „So kărăs?”
13 O Dell či ambolde Pesti xolli;
tala Leste bandeon sal nikărditorea le barimahkă.
14 Thai me sar te dau Les anglal?
Save divanuri te alosarau?
15 Orta te avela ma čeačimos, či daua Les anglal.
Našti dă sar te rudi ma le krisînitorehkă.
16 Thai orta te ašunela ma kana akharau Les,
sa našti te pateau kă ašundea muŕo mui;
17 O, kai šudel ma sar ande khă bravallbrîšindesti,
kai butearăl bi došako mîŕă anglunimata,
18 kai či mekăl ma te phurdau,
čeailearăl ma kărtimastar.
19 Te prastau kai zor? O sî aseazurallo.
Koa čeačimos? Kon nikărăla ma?
20 Orsode čeačimos avela ma, o mui muŕo došavela ma;
thai orsode dă bidošalo avaua, O sîkavela ma sar došalo.
21 Bidošalo! Sîm; ta či nikrau kai čivava, či dabadikhau mîŕî čivava.
22 So fal ma kai urma la urmati?
Kă, zumavau te phenau:
O mudarăl koles le bidošales sar i koles le došales.
23 Thai kana o šukni anelas iekhatar o mullimos! …
Ta O asal le zumaimatăndar kolehkă le bidošalehkă.
24 E phuw sî dini andel vast kolehkă bikrisako;
O garavel le iakha le krisînitorengă; te na O, apo kon aver?
25 Le des mîŕă prasten mai iekhatar sar khă prastaitorii;
našen bi te dikhlino o baxtalimos;
26 nakhăn sar i le beruri kola le iuçîmahkă,
sar o vulturo kai šudel pe poa xamos.
27 Kana phenau: „Kamau te bîstrau mîŕă dukhaimata,
te mekau o tristomos, thai te avau voioso,”
28 sîm darano dă sal dukha mîŕă.
Jeanau kă či ankalavesa ma bidošallo.
29 Thai kana avaua krisînime došallo,
anda soste te mai kărau buti dă ivea?
30 Orta te xalavauas ma iwesa,
orta te ujerau mîŕă vast lăšiasa,
31 Tu sa spidesa ma ande čikh,
ta skîrbona pe i le çoale mandar!
32 Kă O nai khă manuši sar mande,
kaste dau Les anglal,
thai te jeas andekh than kai kris.
33 Čina či nai vokh maškaitorii ande amende,
kai te tho pehko vast pa amende lidui.
34 Te çîrdel Pesti ŕai opral pa mande,
thai te na mai biujarăl ma Lesti dar.
35 Atunčeara daua duma thai či mai daraua Lestar.
Kadeadar, či sîm stăpîno pe mande.