E jertfa sako desăsti.
1 O Rai dea duma le Moisahkă, thai phendea:
2 „De duma le šeavengă le Israelohkă, thai phen lengă: „Te avel tume grija te anen Mangă koa čiro thodino, e pativ Mîŕî le xabenesti, o xamos le jertfengă Mîŕă phabarde iagatar, kai sî Mangă khă khandimatahko čeailo.”
3 Te phenes lengă: „Dikta e jertfa phabardi iagatar kai sî te anen la le Raiehkă: ande sako des, po dui bakriše khă baršehkă bi dukhade, sar phabarimos dă sa biatărdimahko.
4 Te anes khă bakrišo dădroboitu, thai o kolaver bakrišo reate;
5 ta, e pativ le xabenesti, te anes o dešto rig anda khă efa lulludeati aŕăsti, kovleardi ande khă dopašin andai dopaši hinosti zetinohko anda le zetine linčeardea.
6 Kadea sî o phabarimos dă sa biatărdimahko, kai sas andini po baŕbaro o Sinai; khă jertfa phabardi iagatar, khă khandimatahko čeailo le Raiehkă.
7 E jertfa le pimasti te avel dopaši andai dopašin hinosti anda sako bakrišo; e jertfa le pimasti la molleati te kărăs la le Raiehkă ande khă than sfînto.
8 O duito bakrišo te anes les reate, sar khă pativ xabenesti thai khă jertfa pimasti sar kola dădroboitu, kadea să khă jertfa phabardi iagatar, khă khandimatahkă čeailo le Raiehkă.
Je jertfe le Savatohkă thai le šonehkă le nevehkă.
9 Ando des le Savatohko, te anen dui bakriše bi kha dukhako, thai sar pativ xabenesti, dui dešimata anda e lulludi le aŕăsti, kovleardi zetinosa, andekhthan la jertfasa le pimasti.
10 Kadea sî o phabarimos dă sa anda sako des le Savatohko, avri anda o phabarimos dă sa biatărdimahko thai e jertfa lati le pimasti.
11 Mai anglal ka tumară šon, te anen sar phabarimos dă sa le Raiehkă: dui guruwiça, khă bakrišo, thai efta bakrišoră po khă băršehkă bi dukhako;
12 thai, sar pativ xabenesti anda sako guruwiçî, trin dešimata efakă anda e lulludi le aŕăsti, kovleardi zetinosa; sar partiv xabenesti anda le bakriše te anen dui dešimata efakă anda e lulludi le aŕăsti, kovleardi zetinosa;
13 sar pativ xabenesti anda sako bakrišoro, te anen khă dešimos efako anda e lulludi le aŕăsti, kovleardi ando zetino. Kadea sî khă phabarimos dă sa, khă jertfa phabardi iagatar, khă khandimatahko čeailo le Raiehkă.
14 Le jertfe le pimahkă te aven dopaši andai dopašin xinosti molleako anda khă guruwiçî, e trito rig anda khă xino anda khă bakro, thai dopaši andai dopašin xinosti anda khă bakrišoro. Koadoa sî o phabarimos dă sa anda o anglaimos le šonehko, ande sako šon, ande sal šon le băršehkă.
15 Te anel pe le Raiehkă khă busno, sar jertfa le iertimasti, avri anda o phabarimos dă sa bi atărdimahko thai e jertfa lati le pimasti.
Le jertfe la Patradeakă.
16 Ando šon anglal, ando des o dešuštar le šonehko, avena le Patradea le Raiehkă.
17 O des le dešpanjengo kadale šonehko te avel khă des baro. Čiro dă efta des te xan pogăči.
18 Ando des dă anglal, te avel khă tidimos sfînto: te na kărăn či khă buti kandimasti ande leste.
19 Te anen sar phabarimos dă sa le Raiehkă khă jertfa phabardi iagatar: dui guruwiça, khă bakrišo, thai efta bakrišoră bi dukhako.
20 Te mai thon i e pativ lendi le xabenesti andai lulludi le aŕăsti, kovleardi ando zetino, trin dešimata efakă anda khă guruwiçî, dui dešimata anda khă bakrišo,
21 thai khă dešimos anda sako kukola efta bakrišoră.
22 Te anen khă busno anda e jertfa le iertimasti, kaste kărăl iertimos anda tumende.
23 Te anen kadala jertfe, avri anda o phabarimos dă sa dădroboitu, kai sî khă phabarimos dă sa biatărdimahko.
24 Te anen le ande sako des, čiro dă efta des, sar o xamos kha jertfako phabardi iagatar, khă khandimatahko čeailo le Raiehkă. Te aven andine avri le phabarimastar dă sa thai e jertfa lati le pimasti.
25 Ando des o eftato te avel tume kha tidimos sfînto: te na kărăn či khă buti kandimatasti ande leste.
Le jertfe katal Rusalea.
26 Ando des le anglal roadengo, kana anena le Raiehkă khă pativ xabenesti, koa desbaro kana isprăvin pe le kurkă (Panvardešimea), te avel tume khă tidimos sfînto; te na kărăn či khă buti kandimatasti ande leste.
27 Te anen sar phabarimos dă sa, khă khandimatahko čeailo le Raiehkă: dui guruwiça, khă bakrišo, thai efta bakrišoră po khă băršehkă.
28 Te mai thon e pativ lendi le xabenesti anda e lulludi le aŕăsti, kovleardi zetinosa, po trin dešimata anda sako guruwiçî, dui dešimata anda o bakrišo,
29 thai khă dešimos anda sako bakrišoro anda kukola le efta.
30 Te anen khă busno, kaste kărăl iertimos anda tumende.
31 Te anen kadala jertfe, avri anda o phabarimos dă sa biatărdimahko thai e pativ lati le xabenesti. Le bakrišoră te aven bidukhade, thai te thon i le jertfe lengă le pimahkă. Le jertfe ando des la šingako.