1 Mai mišto khă kotor manŕo šuko, pačeasa,
dă sar ăkh khăr pherdo masa, xoleasa!
2 Khă sluga godeasa stăpînil poa šeau kai kărăl lajeau,
thai xulavela o mandimos pehkă phralença.
3 E tigaia lămuril o rup, thai o bou lămuril o sumnakai;
ta kukoa kai zumavel le ille, sî o Rai.
4 Kukoa o nasul ašunel limasa godi ka kukoa le uštesa bikrisako,
thai o xoxamno bandearăl o kan kai šib le xasardimasti.
5 Kon marăl pehkă khălimos le čioŕăstar,
marăl pehkă khălimos Kolestar kai kărdea les;
kon bukuril pe anda khă bibaxtalimos, či ašela bidošalo.
6 Le šeave le šeavengă sî e kununa le phurăndi,
thai le dadda sî e slava lengă šeavendi.
7 Le divanuri le alosarde či lašaon ando mui khă čealadehko;
sodesa mai xançî le divanuri xoxamne ando mui khă manušehkă andai viça alosardi!
8 Le pativa amean khă baŕ kuči ande Ll iakha kolengă kai len le:
or karing ambolden pe, izbutin.
9 Kon garavel khă athadimos, rodel o kamblimos,
ta kon pheneles orkana ande pehkă divanuri, durearăl le amalen.
10 Khă xamos šol pe mai but ande khă manuši prinjeandimahko,
dă sar ăkh šell maladimata ande kukoa o čealado.
11 Kukoa o nasul či rodel dăsar čiungar,
ta khă solo bi milako avela tradino pa leste.
12 Mai mišto te arakhăs khă rišni line latar lakă puien,
dă sar khă čealado ando čealadimos lehko.
13 Kukolehkă kai amboldel nasul andoa mišto,
či mekăla o nasulimos lehko khăr.
14 O gor kha čiungarako sî sar o dimosdrom une paiengo;
andakodea, atărdear e čiungar anglal te astardeol.
15 Kukoa kai iertil le došales thai došarăl le bidošales,
sî lidui khă prikăjimos angloa Rai.
16 Ka soste kandel o rup ando vast le čealadehko?
Te tinel o xaraimos? …Ta nai les godi.
17 O amal o čeačio kamel orkana,
thai ando bibaxtalimos arăsăl sar khă phral.
18 O manuši bi godeako del sumadimos,
thol pe sumadi anda pehko pašo.
19 Kon kamel le zaia kamel e bezex,
thai kon vazdel pesti poarta but učii, rodel pehko xasardimos.
20 Kukoa le illesa bičeačio či arakhăl o baxtalimos,
thai kukoa la šibasa rimome perăl ando bibaxtalimos.
21 Kon del kărimos khă čealadehkă avela les tristomos,
thai o dadd khă čealadehko našti bukuril pe.
22 Khă illo vesălo sî khă lašo leako,
ta khă duxo xolleardo šutearăl le kokala.
23 Kukoa o nasul lel pativa pe garaimaste,
kaste amboldel le droma le čeačimahkă.
24 O xaraimos sî ando mui le manušehko prinjeando,
ta le iakha le čealadehkă roden les koa gor la phuweako.
25 Khă šeau čealado anel năkazo pehkă daddehkă,
thai kărtimos kolakă kai kărdea les.
26 Nai mišto te došaves koles le bibezexales kakh gloaba,
či te malaves koles le neamostar alosardo anda e zan lengă bibezehalimahkă.
27 Kon lopînzîl pehkă orbe, prinjeanel o jeanglimos,
thai kas sî les o duxo kovlo sî khă manuši prinjeando.
28 Orta i khă dillo nakhăla xarano te ašelamuto,
thai dă prinjeando te nikrăla pehko mui.