1 Ašunen, šaoŕalelor, o sîkaimos khă daddehko,
thai len sama, kaste atearăn;
2 kă me dau tume divanuri laše:
na šuden o sîkaimos muŕo.
3 Kă kana sîmas înkă šeau ka muŕo dadd,
thai šeau bujando thai korkoŕo ka mîŕî dei,
4 o sîkavelas ma atunčea, thai penelas mangă:
„Garau mišto ande teo illo le divanuri mîŕă,
arakh le sîkaimata mîŕă thai traisa!
5 Tide xaraimos, tide prinjeandimos;
na bîstăr le divanurii mîră mohkă,
thai na dureo lendar.
6 Na mekh les, thai o arakhăla tu;
kamles, thai nikrăla tu!
7 Dikta o anglal le xaraimahko:
tide o xaraimos, thai ku sa kai sî tu,
tide o prinjeandimos.
8 Vazde les, thai o vazdela tu;
o avela ti slava, te lesa les ande angali.
9 O thola tukă po šero khă kununa čeailimasti,
lašarăla tu kha străfaimasa kununasa thagarni.
10 Ašun, šeaua, le divanuri mîŕă,
thai le bărši tea čivavakă buteona.
11 Me sîkavau tukă o drom le xaraimahko,
ortotu pe le droma le bibezexalimahkă.
12 Kana phirăsa, teo paso či avela lopînzîme;
thai kana prastesa, či ambladeosa.
13 Nikăr o sîkaimos, na mekh les andoa vast;
nikăr les kă o sî ti čivava.
14 Na šu tu po drom kole ăl jungalengo,
thai na phir po drom kolengo la bikrisako!
15 Arakh tu lestar, na nakh pa leste;
delaroata, thai nakh angle!
16 Kă on či soven, kana či kărdine o nasul,
xasaon lendi lindri kana či kărăn varekas te perăl;
17 kă on xan manŕo krisînime,
thai pen moll strandinime la zorasa.
18 Ta o drom kolengo bibezexale
sî sar e lumina străfeaime,
saveako străfeaimos jeal orkana barindoi ji koa maškar le desăhko.
19 O drom kolengo le jungalengo sî sar o tuneriko o thulo,
on či dikhăn sostar ambladeona.
20 Šeaua, le godi kal divanuri mîŕă,
bandear teo kan kal orbe mîŕă!
21 Te na dureon le divanuri kadala anda te iakha,
garav le ando fundo te illehko!
22 Kă on sî čivava anda kola kai arakhăn le,
thai sastimos anda sa lengo stato.
23 Arakh teo illo mai but dă orso,
kă anda leste anklen le isvoare la čivavakă.
24 Našau o bičeačimos anda teo mui;
thai durear o čiorimos pa te ušt!
25 Te iakha te dikhăn orta,
thai le pleoape tiră te roden orta angla tute.
26 O drom pe sao jeas te avel ujo,
thai sal droma tiră te aven jengline:
27 te na les la či ande čeači či ande bičeači,
thai arakh tu nasulimastar.