O PSALMUL 103.
Khă psalmole Davidohko.
1 Dedumadămišto, duxona, le Raies,
thai sa so sî ande mande te deldumadămišto o Anau Lehko o sfănto!
2 Dedumadămišto, duxona, le Raies,
thai na bîstăr či iekh anda Lehkă lašimata!
3 O iertil sa te bezexa,
O sastearăl sa te nasfalimata.
4 O skăpil ti čivava andai groapa,
O kununil tu lašimasa thai milasa;
5 O čeailearăl lašimatănça te phurimata,
thai kărăl tu te tărneos pale sar o vulturo.
6 O Rai kărăl čeačimos thai kris sa kolengă meklinezorasa.
7 O sîkadea Pehkă droma le Moisahkă,
thai le butea Pehkă le šeavengă le Israelohkărăngă.
8 O Rai sî but ajukărimahko thai miloso,
ajukărimahko ŕăbdimahko thai bravalo ando lašimos.
9 O či xal pe biatărdimahko,
thai či nikrăl e xolli ande le veakuri.
10 Či kărăl amengă pala amară bezexa,
či došavel ame pala amară bikrsa.
11 Ta sode sî dă opră le čerurii la phuweatar,
kaditi sî dă baro o lašimos Lehko anda kola kai daran Lestar;
12 sode sî dă dur o ankăstimos le perimastar le khamehko,
kaditi dă but durearăl O amară Bbikrisa amendar.
13 Sar falnasul khă daddes lehkă šeavendar,
kadea falnasul le Raies kolendar kai daran Lestar.
14 Kă o jeanel anda soste sam kărde;
anel Pehkă godi kă sam phuw.
15 O manuši! Lehkă des sî sar e čear,
thai lulludearăl sar e lulludi andoa kîmpo.
16 Kana nakhăl khă braval pa late, manai,
thai o than kai nikrălas les, či mai prinjeanela les.
17 Ta o lašimos le Raiehko nikrăl andel veakuri anda kola kai daran Lestar,
thai e mila Lesti andal šeave le lengă šeavengă,
18 anda kola kai arakhăn o phanglimos Lehko,
thai anen pehkă godi Lehkă mothodimatăngo, kaste arakhăn le.
19 O Rai thodea pehko skamin le raimahko andel čerurea,
thai o raimos Lehko stăpînil pa sa.
20 Dendumadămišto le Raies, înjerea Lehkă,
kai san zurale ande zor, kai pherăn Lehkă mothodimata.
21 Dendumadămišto le Raies, sa Lehkă oštiri,
Lehkă robea, kai kărăn Lehko kamimos!
22 Dendumadămišto le Raies,
sa Lehkă butea, ande sal thana Lehkă stăpînimahkă!
Dedumadămišto, duxona, le Raies!