O PSALMUL 108.
Khă dilabaimos. Khă psalmo le Davidohko.
1 Gata sî muŕo illo te dilabal, Devlla!
Dilabaua, bašavaua anda mîŕă instrumente;
kadea sî mîŕî slava!
2 Ušten ta, lăută thai xarfă!
Ušteaua kana phaŕadeola o des.
3 Lăudiua Tu maškar le popoare, Raia,
dilabaua tu maškar le neamuri.
4 Kă baro sî Teo lašimos thai vazdel pe mai opră le čerurendar,
ta o pateaimos Tiro ji kal norea.
5 Vazde Tu pal čerurii, Devlla,
thai te avel Ti slava pa sai phuw!
6 Anda ka te butkambline te aven skăpime,
skăpisar ame ande čeači Tiri, thai ašun ame!
7 O Dell dea duma ande Pehko sfinçomos: „Biruiua,
xulavaua o Sixemo, măsuriua e xar e Sukot;
8 Muŕo sî o Galaado, Muŕo sî o Manase;
o Efraimo sî o zuralimos Mîŕă šerăhko,
thai o Iuda, e rowli Mîŕî le nikărimasti;
9 O Moabo sî o lideano ande sao xalava Ma;
šudau Mîŕă podimos poa Edomo;
çîpi bukurimastar poa čem le Filistianengo!”
10 Kon nigrăla Ma ande četate e zureardi?
Kon nigrăla Ma ando Edomo?
11 Ta na Tu, Devlla, kai šudean ame,
Thai savo či mai kames te ankles,
Devlla, amară oštirença?
12 De ame kandimos ando năkazo,
kă dăivea sî o kandimos le manušehko.
13 Le Devllesa kărasa butea bară;
O linčearăla amară dušmaien.