O PSALMUL 111.
1 Lăudin le Raies!
Lăudiua le Raies anda sa muŕo
illo, andel jene le manušengo bibezexale thai ando tidimos.
2 Bară sî le butea le Raiehkă,
rodine sa kata kukola kai kamen le.
3 Străfeaimos thai barimos sî e buti Lesti,
thai Lehko čeačimos nikrăl andel veakuri.
4 O meklea khă andimos godeako Lehkă šukarimatăngo,
o Rai sî lašimahko thai miloso.
5 O dea xamos kolen kai daran Lestar;
O anel Pehkă godi orkana Pehkă phanglimastar.
6 O sîkadea Pehkă poporohkă e zor Lehkă buteandi,
kă dea le o mandimos le neamurengo.
7 Le butea Lehkă vastengă sî pateamos thai čeačimos;
sal mothodimata Lehkă sî čeače,
8 zurearde andal veakuri,
kărdine pateaimasa thai bibezexalimasa.
9 Tradea Pehkă poporohkă o skăpimos,
thodea Pehko phanglimos andel veakuri;
Lehko Anau sî sfînto thai daraimahko.
10 E dar le Raiesti sî o maianglal godeaimos;
sa kola kai arakhăn les, sî le khă godi sasti,
thai slava Lesti nikrăl andel veakuri.