O PSALMO 139.
Karing o mai baro le dilabaitorengo. Khă psalmo le Davidohko.
1 Raia, Tu zumaves ma dă pašal thai prinjeanes ma,
2 jeanes kana bešeau tele thai kana ušteau,
thai dă dural šostu ande muro gîndo.
3 Jeanes kana phirau thai kana sovau,
thai prinjeanes sa mîŕă droma.
4 Kă či arăsăl ma o divano pe šib,
thai Tu, Raia, i jeanes les ande sa.
5 Tu desmaroata i palal thai i anglal,
thai thos Teo vast pa mande.
6 Khă prinjeandimos kaditi dă mundrosî mai opral mîŕă zorăndar:
sî but opră kaste dašti astarau les.
7 Kai jeaua dur Te Duxostar,
thai kai našau dur Te Muiestar?
8 Te ankleaua ando čerii, Tu san oče;
te sovaua ando than le mullengo, dikta Tu i oče;
9 te laua le phaka le desăhkă,
thai jeaua te bešeau koa gor la mareako,
10 i oče o vast Tiro phiravela ma,
thai čeači Tiri azbala ma.
11 Te phenaua: „So xançî o tuneriko garavela ma,
thai kărdeola pe reat e lumina anda mîŕî rig!”
12 Dikta kă či orta o tuneriko nai mai tuneriko anda Tute;
ta e reat străfeal sar o des,
thai o tuneriko sar e lumina.
13 Tu kărdean miŕă rîničea,
Tu khuvdean ma ando păŕ mîŕa deiako:
14 Lăudi Tu kă sîm khă manuši kaditi dă šukar.
Šukarimahkă sî le butea Tiră,
thai so mišto dikhăl muŕo duxo e buti kadea!
15 Muŕo stato nas garado Tutar,
kana sîmas kărdo andekh than bijanglo,
akhuwdo ando tipo avervaresohko,
sar ando andraimos la phuweako.
16 Kana či sîmas dă sar khă gloata bimuiehko, Te iakha dikhănas ma;
thai ando lill Tiro sas ramome sal desa kai sas mangă dine,
mai anglal te avilino vo iekh anda lende.
17 Sode dă biprinjeande fal pe mangă le gîndurea Tiră, Devlla,
thai sode dă baro sî lengo dindimos!
18 Te dinaua le, sî mai but dă sar le boambe la tišaiakă.
Kana ušteau sîm sa Tusa.
19 O, Devlla, te mudarăsa koles le jungales!
Dureon mandar, manuši trušale ratestar!
20 On den duma pa Tute sar tipo bikrisako,
Len Teo Anau kaste xoxaven, on le dušmaia Tiră!
21 Te na dabadikhau me, Raia, kolen kai či dabadikhăn Tu,
thai te na avel mangă greaça kolendar kai vazden pe pa Tute?
22 E, či dabadikhaule khă bidikhlimahko bigorăhko;
dikhau le sar mîŕă dušmaien.
23 Zumau ma, Devlla, thai prinjean muŕo illo!
Zumau ma, thai prinjean mîŕă gîndurea!
24 Dikh kana sîm pe khă drom nasul,
thai nigăr ma po drom o vešniko!