O PSALMO 147.
1 Lăudin le Raies!
Kă sî mundro te lăudisaras amară Devlles,
kă sî drago, thai fal pe te lăudisaras Les.
2 O Rai vazdel pale o Ierusalimo,
tidel le telearden le Israelohkărăn;
3 sastearăl kolen le illesa linčeardo,
thai phandel lengă dukha.
4 O dinel, sode sî le čeraia,
thai dele anav ka sa.
5 Baro sî amaro Rai thai zuralo ande zor Lesti,
o prinjeandimos Lehko sî bi rigăngo.
6 O Rai nikrăl kolen le bibaxtalen,
thai peravel kolen le jungalen kai phuw.
7 Dilaban le Raiehkă naismatănça,
lăudin amară Devlles la xarfasa!
8 O pherăl o čerii norença,
laxšarăl o brîšind andai phuw,
thai kărăl te lulludil e čear pel baŕlebară.
9 O del xamos le jivinen,
thai le puiengă le korbohkă kana çîpin.
10 Na la zoratar le grastesti bukuril pe O,
či arakhăl pehko čeailimos andel pînŕă le manušehkă.
11 O Rai kamel kolen kai daran Lestar,
kolen kai ajukrăn ando lašimos Lehko.
12 Lăudisar le Raies, Ierusalimona,
lăudisar te Devlles, Sioane!
13 Kă O zurearăl le druguri le udarăngă,
O deldumadămišto te šaven ande teo maškar;
14 O del pačea tea phuweakă,
thai čeailearăl tu le mai laše divesa.
15 O tradel pehkă mothodimata pe phuw,
Lehko Divano našel iuçîmasa baro.
16 O del o iw sar e pošom,
O thol e parni buŕ sar o ušar;
17 O šudel pehko pao andel kotora;
kon dašti bešel angla Lehko šill?
18 O tradel Pehko Divano, thai bilavele;
thol te phurdel Lesti bravall, thai le paia thawden.
19 O sîkavel le Iakovohkă Pehko Divano,
thai le Israelohkă le krisa thai le mothodimata Lehkă.
20 O či kărdea buti kadea sa le neamurença,
thai on či prinjeanen Lehkă mothodimata.
Lăudin le Raies!