O PSALMO 38.
Khă psalmo le Davidohko. Andimahko godi.
1 Raia. Demangă duma ande Ti xolli,
thai na došarma ande Teo xolearimos.
2 Kă le sîjeçi Tiră pusadepe ande mande,
thai Teo vast mekăl pe pa mande.
3 Či mai ašilea khanči sastevesto ando mas muŕo, anda e xolli Tiri;
manai či khă zor andel kokala mîŕă, pala e bezex mîŕî.
4 Kă mîŕă bikrisa vazden pe opral pa muŕo šero;
Ssr khă baro pharimos, sî but phară anda mande.
5 Le šindimata mîŕă khanden pharăs thai sî pherde patimos,
pala muŕo dilimos.
6 Sîm bandeardo, but dă but ašado;
soro des phirau pherdo tristomos.
7 Kă ăkh dukh phabardi šinel mîŕă poŕa,
thai či mai ašilea khanči sastevesto ande muŕo mas.
8 Sîm bi zorako, linčeardo biatărdimahko;
o biujimos mîŕă illehko kărăl ma te çîpi.
9 Raia, sa mîŕă kamblimata sî angla Tute,
thai le roimata mîŕă nai Tukă biprinjeande.
10 O illo marăl mangă iekhatar, e zor mekăl ma,
thai lumina mîŕă iakhăndi manai mança.
11 Le amal thai le prinjeande mîŕă dureon mîŕa dukhatar,
thai le neamuri mîŕă bešen rigate.
12 Kola kai kamen te len mîŕî čivava tinzon pehkă astardimata;
kola kai roden muŕo bibaxtalimos, phenen jungalimata,
thai soro des kărăn athadimata.
13 Ta me sîm sar khă kašuko, či ašunau;
Sîm sar khă muto; kai či pîtărăl o mui.
14 Sîm sar khă manuši, kai či ašunel,
thai ando mui savehko nai či khă dimos anglal.
15 Raia, ande Tute ajukărau;
Tu desa anglal, raia, Devlla!
16 Kă phenau: „Na mekh te bukurin pe le dušmaia mîŕă mandar,
thai te denpe bară pa mande, kana muŕo punŕo perăla!”
17 Kă sîm paše te perau,
thai dukh mîŕî sî orkana angla mande.
18 Phenau mîŕî bikris,
dukhal ma mîŕa bezexatar.
19 Ta le dušmaia mîŕă sî pherde čivava thai pherde zor;
kola kai či dabadikhăn ma bičeačimahko, sî but koa dindimos.
20 On ambolden mangă nasul andoa mištimos,
on nai mança, anda kă me phirau pala o mištimos.
21 Na mekh ma, Raia!
Devlla, Te na dureo mandar!
22 Av iekhatar ande muŕo kandimos,
Raia, o Skăpimos muŕo!