O PSALMO 40.
Karing o maibaro le dilabaitorengo.
Khă psalmo le Davidohko.
1 Thodemas muŕo ajukărdimos ando Rai,
thai O bandi'lo karing mande,
ašundea mîŕă çîpimata.
2 Ankaladea ma andai groapa le merimastii, anda O fundo la čikako;
thodea mîŕă pînŕă po kotorlebaŕăhko, thai zureardea mîŕă pašea.
3 Thodea mangă ando mui khă dilabaimos neo, khă lăudimos andoa Dell amaro.
But dikhline e buti kadea, darai'le, thai pateaie pe ando Rai.
4 Baxtalo le manušestar, kai thol pehko pateaimos ando Rai,
thai sao či ortol pe karing kola le barimatăngă thai xoxamne!
5 Raia, Devlla, but sî le šukarimata thai le planurea Tiră anda mande:
khonikh našti ameal Tusa.
Kamaua te vesti le thai te Šingarau le,
ta o dindimos lengo sî but baro kaste phenau le.
6 Tu na kames či jertfa, či pativ xabenesti,
ta xîvardean mîŕă kan;
či mangăs či phabarimos dă sa, či jertfa skăpimasrti.
7 Atunčea phendem: „Dikhta ma kă avau! –
ando papiro le lillehko sî ramome pa mande –
8 kamau te kărau so Tu mangăs, Devlla!
Thai e Kris Tiri sî ando fundo mîŕă illehko.
9 Vestiu e mila Tiri, ando tidimos kukoa o baro;
dikta kă či phandavau mîŕă ušt.
Tu jeanes e buti kadea, Raia!
10 Či nikrau ando illo muŕo e milla Tiri,
ta vestiu o čeačimos Tiro thai o skăpimos Tiro,
thai či garavau o lašimos thai o pateaimos Tiro ando tidimos kukoa o baro.
11 Tu, Raia, či atărdearăsa mangă le lašimata Tiră;
ta o lašimos thai o pateaimos Tiro arakhăna ma orkana.
12 Kă nasulimata bi dindimahko aven pe mande,
arăsle ma le došalimata anda le bikrisa mîŕă; našti te mai răbdi lengo dikhlimos.
Sî mai but sar le ball mîŕă šerăhkă, thai kovleol muŕo illo.
13 Skîpisar ma, Raia! Av, Raia, iekhatar ando kandimos muŕo!
14 Te aven lajavehkă thai perade,
sa kola kai kamen te len mîŕî čivava!
Te den parpale thai te lolleon lajavestar
kola kai kamen muŕo xasarimos!
15 Te ašen kašteardine lengă lajavestar,
kola kai phenen mangă: „Ha! Ha!”
16 Te bukurin pe thai te vesălin pe ande Tute sa kola kai roden Tu!
Kola kai kamen o skăpimos Tiro te phenen bi atărdimahko:
„Baro te avel o Rai!”
17 Me sîm čioŕo thai lipsome,
ta o Rai del Pe godi mande.
Tu san o kandimos thai o skăpitorii muŕo:
av iekhatar, Devlla!