O PSALMO 55.
Karing o mai baro le dilabaitorengo. Dă dilabaimos le instrumentença le koardença. Khă dilabaimos le Davidohko.
1 Le godi, Devlla, koa rudimos muŕo,
thai na garadio mîŕă rudimatăndar!
2 Ašun ma thai de ma anglal!
xasardiuau kote thai întea, thai kovleardiuau,
3 andoa mui le dušmanohko
thai andoa meklimos le nasulimatahko.
Kă on šuden o bibaxtalimos pa mande,
thai phirăn pala mande xolleasa.
4 Isdral o illo ande mande,
thai astarăl ma e dar le mullimasti,
5 astarăl ma e dar thoa daraimos
thai len ma le daraimata.
6 Me phenau: „O, te avino ma le phaka le golumbohkă,
sahkă xureau, thai sahkă arakhau varekai than xodinimahko!”
7 E, sahkă našau dur dă sa,
thai jeauas te bešeau ande pustia. (Atărdimos) .
8 Sahkă našau iekhatar kakh garaimos
la bravalleatar kadalatar thai le barăbrîšindestar kadalestar.
9 Mudar le, Raia, xulau lengă šiba,
kă ande četatea dikhau xolli thai čiungara;
10 des thai reat on okolin pel zidurea:
e bikris thai o nasulimos sî ande lengo kolin;
11 o nasulimos sî ando maškar lako,
thai o čiorimos thai o athadimos nai le gor ande lakă pieçe.
12 Na khă dušmano prasal ma, kă sahkă ŕăbdi:
Na kukoa kai nai mança vazdel pe pa mande,
kă sahkă garadiuau angla leste.
13 Ta tu, kai dinauas tu iekh sar mança,
tu, phral trušulehko thai amal mança!
14 Ame, kai traisaras andekhthan ando čeailo amalimos,
thai jeasas andekhthan le butimasa ando Khăr le Devllehko!
15 Te avel o mullimos pa lende,
thai te ulen dă juwinde ando than le mullimahko!
Kă o nasulimos sî ande lengo than, ande lengo illo.
16 Ta me çîpi karing o Dell,
thai o Rai skăpila ma.
17 Reate, droboitu thai koa dopaši le desăhko,
xondi thai rovau, thai O ašunela muŕo mui.
18 Skăpila ma andoa mardimos kai del pe pa mande, thai anela mangă e pačea,
kă but mai sî pa mande!
19 O Dell ašunela ma, thai mekălaletele,
O, kai, ando veako, bešel po skamin Lehka raimahko. (Atărdimos) .
Kă ande lende nai či khă ajukărimos paruglimahko,
thai či daran le Devllestar.
20 On thon o vast pe kola kai trainas ande pačea lença,
thai ušteaven pehko phanglimos.
21 Lengo mui sî guglo sar e smîntîna,
ta ando illo phiraven mardimos:
le divanuri lengă sî mai isdrane sar o zetino,
ta kana anklen on andoa mui, sî varesar săbii.
22 Tho ti bax ando vast le Raiehko, thai O nikrăla tu.
O či mekăla tu čiăkhdata te perăl kukoa o bibezexalo.
23 Thai Tu, Devlla, ulearăsa le ando fundo la groapako.
Le manuši trušale ratestar thai athaimastar, či arăsăna či o dopaši lengă desăngo.
Ta me patea ma ande Tute!