O PSALMO 59.
Karing o mai baro le dilabaitorengo.” Na xasar.” Khă dilabaimos lăudimahko le Davidohko. Kărdino kana tradea o Saulo te okolin lehko khăr, kaste mudarăn les.
1 Devlla, skăpisar ma mîŕă dušmaiendar,
arakh ma le dušmaiendar mîŕăndar!
2 Skăpisar ma le čiorăndar,
skăpisar ma le manušendar trušale ratestar!
3 Kă dikta bešen te arakhăn te len mîŕî čivava;
varesar manuši telearde koa nasul kamen butea nasul pa mande,
bi te avau došalo, bi te bezexardino, Raia!
4 Sa mîŕă bidošalimasa, on prasten, lašardeon:
ušti Ta, ankli angla mande, thai dikh!
5 Raia, Devlla le oštirengo, Devlla le Israelohko,
ušti Ta, kste došarăs sal neamurea!
Na avel tu milači iekhăstar anda kadala bitindorea bikrisako. (Atărdimos) .
6 Ambolden pe ande sako reat, xunxuin sar varesar jukăl,
thai denroata e četatea.
7 E, anda lengo mui xutel o nasul,
pel ušt lengă sî le săbii;
kă phenen: „Kon ašunel?”
8 Ta Tu, Raia, asas lendar,
Tu marăs Tukă asamos anda sal neamurea.
9 Orsavi avela lendi zor, me ande Tute ajukărau,
kă o Dell sî muŕo skăpimos.
10 Devlla muŕo, ando lašimos Lehko, anklel mangă anglal,
o Dell kărăl ma te dikhau pherdo
o kamimos angla kola kai našaven ma.
11 Na mudar le, kaste na bîstrăn e buti kadea muŕo poporo,
ta kăr le te phirăn, andai zor Tiri,
thai perav le, Raia, o Skuto amaro!
12 O mui lengo bezexarăl ka sako divano, kai anklel lengă pal ušt:
te astardeon ande lengo barimos,
kă či phenen dăsar armaia thai xoxaimata:
13 Mudar le, ande xoli Tiri, mudar le, kaste na mai aven!
Kăr le te jeanen kă thagaril o Dell poa Iakovo,
ji kal gora la phuweakă. (Atărdimos) .
14 Ambolden pe ande sako reat, xunxuin sar varesar jukăl,
thai denroata e četatea.
15 Phirăn orde thai întea pala xamos,
thai phirăn e reat bi te čeaileon.
16 Ta me dilabaua e zor Tiri;
dădroboitu lăudiua o lašimos Tiro.
Kă Tu san ăkh turno skăpimahko anda mande,
khă than garaimahko ando des mîŕă nasulimahko.
17 O, e Zor mîŕî! Tut lăudiua Tu,
kă o Dell, o Dell muŕo kukoa o lašo, sî o turno muŕo le skăpimahko.