O PSALMUL 69.
Karing o mai baro le dilabaitorengo.Dilabaimahko sar i „Le Krinea”: Khî psalmo le Davidohko.
1 Skăpisar ma, Devlla, kă le paia len mîŕî čivava.
2 Me tasuvau ande čikh, thai našti nikra ma;
Pelem ande xarandră, thai den le paia pa mande.
3 Natši mai çîpiu, šuteol muŕo gîrteano,
bilan mîŕă iakha, dikhlindoi karing o Dell muŕo.
4 Kola kai či dabadikhăn ma, sî mai but dă sar le ball mîŕă šerăhkă,
so zurale sî kola kai kamen te xasarăn ma,
kola kai po bičeačimos sî mangă dušmaia;
trăbul te dau parpale so či čiordem.
5 Devlla, Tu prinjeanes muŕo dilimos,
thai sa le athadimata mîŕă nai Tukă biprinjeande.
6 Te na ašen lajavehkă, anda mîŕî doši,
kola kai ajukrăn ande Tute,
Raia, Devlla le oštirengo!
Te na lolleon lajavestar, andai doši mîŕî,
kola kai roden Tu, Devlla le Israelohko!
7 Kă anda Tute phiravau me o prasaimos,
thai garavel o lajau muŕo mui.
8 Arăslem khă străino anda mîŕă phral,
thai khă biprinjeando andal šeave mîŕa dakă.
9 Kă o čeačimos Te Khărăhko xal ma
thai le prasaimata kolengă kai prasan tu Tut perăn pa mande.
10 Rovau thai posti,
thai on prasan ma.
11 Xureava ma ando gono,
thai on marăn pehkă khălimos mandar.
12 Kola kai bešen koa udar den duma pa mande,
thai kola kai pen pimata zurale thon ma andel dilea.
13 Ta me karing Tute vazdau muŕo rudimos, Raia,
koa čiro lašardo.
Ando lašimos kukoa Tiro o baro,
de ma anglal, Devlla, thai de ma o kandimos Tiro!
14 Ankalau ma andai čikh, kaste na mai tasuau!
Te avau skăpime mîŕă dušmaiendar thai andai xarebari!
15 Te na mai den le valurea pa mande!
16 Ašun ma, Raia, kă o lašimos Tiro sî bigorăhko.
Ande mila Tiri e bari, ambolde Te iakha karing mande,
17 thai na garau o mui le robostar Tirăstar!
kă sîm ando năkazo: iuçîsar ta ašun ma!
18 Pašo Ta mîŕă duxostar thai skăpisar les!
Skăpisar ma, andai zan le dušmaiendi mîŕăndi!
19 Tu jeanes so lajau, thai so prasaimos thai so lajau kărdeol pe mangă;
sal dušmaia mîŕă sî angla Tute.
20 O prasaimos šinel muŕo illo, thai sîm nasfalo;
ajukrau te avel varekas mila mandar, ta dăivea,
ajukrau te miluin ma, ta či arakhau či iekh.
21 On thon mangă fiarea ando xabe, thai,
kana mangă truši, den ma te peau šut.
22 Te parugleon lendi skafidi andekh astardimos,
thoa ujimos andekh phal!
23 Te kaleon lengă iakha, thai te na mai dikhăn,
thai perau butivar lengă tičiuri!
24 Šor Ti xoli pa lende,
thai te astarăle o phabarimos Tiro astardo!
25 Pusto te ašel lengo bešlimos,
thai khonikh te na mai bešel ande lengă çăre!
26 Kă on našaven koles malado Tutar,
phenen le dukhauimata kolengă dukhade Tutar.
27 Thon aver bezeha kal bezexalimata lengă,
thai te na avele rig Tea milata!
28 Te aven khosle andoa lill la čivavako,
thai te na aven ramome andekhthan kole bibezexalença!
29 Me sîm bibaxtalo thai nasfalo:
Devlla, o kandimos Tiro te vazdel ma!
30 Atunčea lăudiua o Anau le Devllehko andel dilabaimata,
thai andel lăudimata barearaua Les.
31 E buti kadea sî mai čeaili le Raiehkă, sar khă guruwiçî
šingănça thai kopitença.
32 Le bibaxtale dikhle e buti kadea thai bukurin pe;
tume, kai roden le Devlles, vesălo te avel tumaro illo!
33 Kă o Rai ašunel kolen le čioŕăn,
thai či bidinel le astarden Lehkărăn le mardimahkă.
34 Te lăudin Les le čerurii thai phuw,
le mări thai sa so mištil ande lende!
35 Kă o Dell skăpila o Siono, thai vazdela ăl četăçi le Iudahkă,
on avena bešline thai line ando stăpînimos;
36 e sămînça Lehkă robendi lela le,
thai kola so kamen o Anau Lehko bešena ande lende.