O PSALMO 7.
Khă dilabaimos roimahko le Davidohko. E dili le Raiesti andai zan le divanurendi le Beneamitohko Kuš.
1 Raia, Devlla, ande Tute rodau muŕo skăpimos!
Skăpisar ma anda sal našaitorea mîŕă thai nikăr ma,
2 kaste na phaŕaven ma sar khă leo,
kai nakhavel bi te xutel lehkă varekon ando kandimos.
3 Raia, Devlla, kana kărdem khă kadea vareso nasul,
Kana sî bikrisako le vast mîŕă,
4 kana potindem nasulimasa koles kai trailas ande pačea mança,
thai či dem drom koles kai mekălas pa mande dă iveantaină,
5 atunčeara: te phirăl pala mande o dušmano thai te arăsăl ma,
te ušteavel mîŕî čivava kai phuw,
thai mîŕî slava ande poši te šudela mangă! (Atardimos)
6 Ušti Ta, Raia, Tea xolleasa!
Ušti Tapa e urgia mîŕă dušmaindi,
ušti Ta kaste kandes ma,
thai lašarta khă kris!
7 Te den tu angali o tidimos le popoarăngo,
thai beši mai opră sar leste, koa učimos!
8 Raia krisînisar le popoare:
kăr mangă čeačimos Raia, pala o bibezexalimos thai o bidošalimos muŕo!
9 Uf! tho ăkhdata gor le jungalimatăngă le nasulengă,
thai zurear koles le bibezexales,
Tu, kai rodes le ille thai le rîničea, Devlla orta!
10 O skuto muŕo sî ando Dell,
kai skăpil kolen le illesa ujo.
11 O Rai sî khă krisînitorii orta,
khă Dell kai xolleaol ande sako čiro.
12 Kana kukoa o jungalo či amboldel pe koa
Dell, o Dell askuçăl pesti sabia,
çîrdel o arko, thai iakharăl,
13 ortol pa leste săjeçi mudarditoare
thai šudel lehkă săjeçi phabardimahkă!
14 Dikta kă kukoa o nasul lašarăl o nasulimos,
o del godi e bikris, thai kărăl o atxadimos:
15 kărăl khă groapa, xunavela,
thai sa o perăl ande groapa kai kărdea la.
16 E bikris kai o astardea la,
Amboldel pe pa lehko šero,
thai xolli kai lea la, ulel parpale pe troaka lehkă šerăsti.
17 Me lăudiva le Raies anda Lehko čeačimos,
thai dilabaua o Anau le Raiehko,
o Anau Lehko o But Baro.