O PSALMUL 79.
Khă dilabaimos le Asafohko.
1 Devlla, prastaine le neamuri ando mandimos Tiro,
prikăjisarde o Templo Tiro o Sfînto,
thai parugline o Ierusalimo andekh dîmpo baŕăngo.
2 Le staturi biduxohkă le robengă Tiră dine le te xan le ăl čiriklea le čerehkă,
thai o mas Te pateamnengo dine les te xan les ăl jivine la phuweakă.
3 Sar o pai šordine lengo rat, ande sal riga le Ierusalimohkă,
thai nas khonikh te praxon le.
4 Arăsleam prasaimahkă amară pašengă,
mardimos khălimahko thai asamahko kolengă kai den ame roata.
5 Ji kana, Raia, xolleaosa biatărdimahko
thai phabola Ti xolli sar e iag?
6 Šor Ti xolli pal neamuri,
kai či prinjeanen Tu, thai pa le thagarimata,
kai či akharăn o Anau Tiro!
7 Kă xaline le Iakovos,
thai pustiisarde lehko than.
8 Na mai an Tukă godi le bikrisango amară papurengă,
ta te anklen amengă iekhatar anglal le lašimata Tiră!
Kă sam bibaxtale dă sa!
9 Kande ame, Devlla amară skăpimahko,
anda e slava Te Anavesti!
10 Anda soste te phenen le neamuri: „Kai sî lengo Dell?”
Te jeangleol pe, anglal iakha amară, maškar le neamuri,
kă Tu amboldes o rat šordo Te robengo!
11 Te arăsăn ji Tute le roimata le astardengă le mardimahkărăn!
Skăpisar, le vastesa Tirăsa le zuralesa, kolen kai xasaon!
12 Ambolde amară pašengă, eftavar ande lengo bărkh,
le prasaimata, kai šude Tukă le on Tukă, Raia!
13 Thai ame, o poporo Tiro, o kîrdo la čeareako Tireko,
lăudisarasa Tu ando veako,
thai phenasa neamo anda neamoste le lăudimata Tiră.