O PSALMUL 81.
Karing o mai baro le dilabaitorengo.Dă dilabaimos Po Ghitito.Khă psalmo le Asafohko.
1 Dilaban vesălimasa le Devllehkă, kai sî amari zor!
Vazden çîpimata bukurimahkă le Devllehkă le Iakovohkă!
2 Dilaban khă dili, bašaven andai toba,
andai xarfa e čeaili thai andai lăuta!
3 Bašaven andai šing koa šonuto o neo,
koa šonuto pherdo, ando des amară desăhkolebarăhko.
4 Kă kadea sî khă kris andoa Israelo,
khă mothodimos le Devllehko le Iakovohkă.
5 O thodea o desbaro kadoa anda o Iosifo,
kana gălo pa o čem le Ejiptohko…
Atunčeara ašundem khă mui, savo či prinjeandem les:
6 „Lem tele lehko pharimos poa dumo,
thai lehkă vast či mai nikrăn o košo.
7 Çîpisardean ando năkazo, thai skăpisardem tu;
thai zumadem tu kal paia le Meriba.
8 Ašun, Muŕo poporo, thai sîkavaua tu,
Israelona, te ašunesa Ma!
9 Či khă del străino te na avel ande teo maškar,
thai te na bandeos anglal devla le străinuri!
10 Me sîm o Rai, o Dell tiro,
kai ankaladem tu andoa čem le Ejiptohko;
buflear teo mui, thai pheraua tukă les!”
11 Ta o poporo Muŕo či ašundea Muŕo mui,
o Israelo či ašundea Ma.
12 Atunčea meklem le ando kamimos
le telearimahko lengă illehko,
thai phirde pala lengă divanuri.
13 O! te ašunela Ma o poporo Muŕo,
te phirăla o Israelo ande Mîŕă droma!
14 Andekh leaka sahkă peravau lengă dušmaien,
amboldava Mîŕî xolli pal dušmaia lengă;
15 kola kai či dabadikhăn le Raies, sahkă čearăn Les,
thai o baxtalimos le Israelohko sakhă trail ando veakuri.
16 Thai sahkă pravarau le ăl divesa le mai lašesa,
thai sahkă čeailearau le avdinesa andoa Kotorlebaŕăhko.”