O PSALMUL 83.
Khă dilabaimos. Khă psalmo le Asafohko.
1 Devlla, na ašimuto!
Na ašimuto, Ta na xodinisao, Devlla!
2 Kă dikta kă le dušmaia Tiră kovleardeon pe,
thai kola kai čidabadikhăn Tu vazden o šero.
3 Kărăn planurea pherde čiorimata pa Teo poporo,
thai den pe duma pa kola nikărdine Tutar.
4 „Aven”, phenen on „te mudaras le andoa maškar le neamurengo
kaste na mai phendeol pe o anau le Israelohko.
5 Tiden pe saoŕă khă illesa,
kărăn phanglimos pa Tute:
6 le çăre le Edomohkă thai le Ismaleiçea,
o Moabo thai le Xagareniçea,
7 o Ghebal, o Amon, o Amalek,
le Filistenea le manušença le Tirohkărănça.
8 E Asiria tidel pe i oi lença,
thai del unjile pehko vast le šeavengă le Lotohkă. (Atărdimos).
9 Kăr lengă sar le Madianohkă,
sar le Siserahkă, sar le Iabinohkă koa paioro le Chisonohko,
10 kai sas mudarde ando En-Doro,
thai arăsle khă gošni la phuweakă.
11 Le šerălebarăngă lengă kăr lengă Sar le Orebohkă thai le Zeebohkă,
Thai sa le raimatăngă lengă sar le Zebaxohkă thai le Çalamunahkă!
12 Kă on phenen: „Te thoas o vast
pe le thana le Devllehkă!”
13 Devlla, kăr lengă sar e bravall la pošati,
sar o sulum lino la bravalleatar,
14 sar e iag kai phabarăl o văši,
thai sar e para, kai astarăl le Baŕlebară!
15 Phir pala lende Te barăbrîšindesa,
thai šu e dar ande lende Tea bravalleasa!
16 Garav lengo mui lajavesa,
kaste roden Teo Anau, Raia!
17 Te aven lajavehkă thai darardine ando veako,
te lolleol lengo mui lajavestar, thai te xasaon!
18 Kaste jeanen kă dăsar Tu, savehko Anau sî o Dell,
Tu san Kukoa But Baro pe sai phuw;