O PSALMUL 85.
Karing o mai baro le dilabaitorengo. Khă psalmo le šeavengă le Koreahkă.
1 Tu sanas lašimasa le čemesa Tirăsa, Raia!
Andean parpale le astarden le mardimahkărăn le Iakovohkă;
2 iertisardean e bikris Te poporosti,
3 garadean sa lehkă bezexa; (Atărdimos)
dean rigate sa Teo astardimos,
thai amboldean Tu andoa iuçîmos Tea xolleako.
4 Ambolde ame pale, Devlla amară skăpimahko!
Atărdear Ti xolli pa amende!
5 Ando veako avesa xolleariko pe amende?
Andel veakuri nikrăs Ti xolli?
6 Či ušteaves ame pale,
anda kaste bukuril pe o poporo Tiro ande Tute?
7 Sîkau amengă, Raia, o lašimos Tiro,
thai dea me Teo skăpimos!
8 Me ašunaua so phenel o Dell, o Rai:
kă O del duma pačeasa Pehkă poporohkă thai Lehkă kamblimengă,
dăsar, te na perăn pale ando dilimos.
9 E, o skăpimos Lehko sî paše kolendar kai daran Lestar,
anda kaste ande amaro čem, te bešel e slava.
10 O lašimos thai o pateaimos arakhadeon,
o čeačimos thai e pačea čiumiden pe.
11 O pateaimos lulludearăl andai phuw,
thai o čeačimos dikhăl opral andal čerurii.
12 O Rai dela ame i baxtalimos,
thai e phuw amari dela pehkă roduri.
13 O čeačimos phirăla angla Leste,
thai jeala, ušteaindoi pel urme Lehkă pasurengă!