O PSALMUL 88.
Khă dili.Khă psalmo le šeavengo le Korehkă. Karing o mai baro le dilabaitorengo.Dă dilabaimos le flautosa. Khă dilabaimos le Xemanohko, o Ezraxito.
1 Raia, Devlla mîŕă skăpimahko!
Des thai reat çîpi angla Tute!
2 Te arăsăl o rudimos muŕo angla Tute!
Le sama kal manglimata mîŕă;
3 kă čeaili'lo muŕo duxo nasulimatăndar,
thai pašol mîŕî čivava le thanestar le mullengărăstar.
4 Sîm thodino ando širo kolengo kai ulen ande groapa,
sîm khă manuši, kai manai les zor.
5 Bešeau tinzome maškar kola le mule,
sar kola mudarde thai sutine ando mormînto,
savendar či mai anes Tukă godi,
thai save sî xulade Te vastestar.
6 Šudean ma ande groapa e mai telal,
ando tuneriko, andel xareandră.
7 E xolli Tiri phareol pe mande,
thai des pa mande sal valurea Tiră. (Atărdimos) .
8 Dureardean mandar sa mîŕă amalen,
kărdean ma khă buti greaçati anda lende;
sîm phandado thai našti mai ankleau.
9 Bilan mîŕă iakha dukhatar;
ande sal des akarau Tu, Raia,
thai tinzo mîŕă vast karing Tute!
10 Ta andal mulle kărăs Tu šukarimata?
Or mai ušten le mulle Te lăudin Tu? (Atărdimos) .
11 Del pe duma Te lašimastar ando Mormînto,
thai le pateaimastar Tirăstar ande Xareandră?
12 Sî prinjeande le šukarimata Tiră ando tuneriko,
thai o čeačimos Tiro ando čem le bîstărimahko?
13 Raia, me mangau Teo kandimos
thai dădroboitu o rudimos muŕo vazdel pe Tute.
14 Andasoste, Raia, šudes o duxo muŕo?
Andasoste garaves mangă Teo Mui?
15 Andoa tărnimos, sîm bibaxtalo Thai çîrdau te merau,
sîm astardo le daraimatăndar Tirăndar,
thai či mai jeanau so te kărau.
16 E xolli Tiri nakhăl pa mande,
le daraimata Tiră mudarăn ma dă sa.
17 On den ma angali soŕo des, sar varesar paia,
phatearăn ma sa andakhdata.
18 Dureardean mandar mîŕă amalen thai le jenen;
thai kola dă pašal mîŕă kărdi'le bidikhle.