Evanghelia pala o Matei 1996 (ursarilor România) (ROMURS)
14

O șăro le Ioanosco o Bolitori si cindo. O Iisus ceailiarel pangi mii manuș, phirel p‐o plai, sastearel le nasvalen cai machen‐pe Lestar.

141Andă codol ghesa, așundea o cîrmuitoro o Irod anda o anau le Iisusosco cai phendilo anda Leste. 2Hai phendea pe slujenghe: Cadaua si o Ioano o Bolitori; ou uștilo anda‐l mule, hai codolasche cherdon minuni lesa. 3O Irodo, cana astardea le Ioanos, phanglea‐les hai ciutea‐les and‐o phandaimos, anda‐i Irodiada, e giuvli le Filiposchi, lesco phral. 4O Ioano phendeas‐lesche: Nai mișto te avel tuche dă romni. 5Hai ou camindos te mundarel‐les, ta daralas catar ăl but manușa, că on phenenas că si prooroco. 6Ta sar înghiarelas pio ghes cana cherdilo, e cei le Irodiachi cheldeas andă lengo mașcar hai le Irodos placioial‐les. 7Hai phanglilo sovleasa că dela la so oi camela. 8Ta oi, ciutini catar pi dei, phendea: De‐man, cathe and‐ăc ciaro, o șăro le Ioanosco o Bolitori. 9O thagar mîhnosailo, ta, că phanglilo sovleasa and‐ăl manuș cai as othe che sinia, poruncisardea te anelles. 10Hai dinea drom hai cindea o șăro le Ioanosco, and‐o phandaimos. 11Lesco șăro sas andino and‐ăc ciaro hai dino che cei, hai oi înghiardea‐les că pi dei. 12Hai, avindos lesche ucenice, lile lesco corpo hai prahosarde‐les hai ghele ta phende le Iisusosche. 13Cana așundea o Iisus, teleardea othar corcoro, le corabiasa, and‐ăc than mulano, ta, cana așunde, but manușa avile pala Leste, telal, and‐ăl foruri. 14Cana înclisto, dichlea manuș but, hai cherdea‐Pesche mila lendar hai sasteardea lenghe nasvalen. 15Ta cana cherdili e reat, ăl ucenice avile pala Leste hai phende‐Lesche: O than si mulano, o ghes nachlo; much hai de drom le manușănghe te gian and‐ăl gaua, te chinen hamos. 16O Iisus boldea‐lenghe: Ni trăbul te gian; den‐le tume te han. 17Ta on phende‐Lesche: Nai amen cathe numa pangi marne hai dui mace. 18Hai Ou phendea: Anen‐le Mande cathe. 19Hai poruncindos te cion‐pe ăl manuș tele p‐e ciar, lilea ăl pangi marne hai ăl dui mace, ciutea‐Pe iacha opre, dinea duma mișto, phaglea ăl marne hai dinea că Pe ucenicenghe, hai ăl ucenice că codol but manușa. 20Hai hale sea hai ceailile ta mai lile pala lende prușuca, deșudui tîrne pherde. 21Codola cai hale sas sar c‐ăl pangi mii murș, afer anda‐l giuvlea hai ăl ciauăra. 22Pala codoia, o Iisus ciutea Pe ucenicen te ușten and‐e corabia hai te nachen angla Leste, părdal o pai, gi cana Ou dela o drom codol bute manușănghe. 23Pala so dinea o drom le manușănghe, uștilo opre p‐o plai, te rughil‐Pe corcoro. Peli e reat hai Ou sas corcoro othe. 24E corabia sas acana cam dur catar e phuî, sas bare valurea, hai barval marelas angla lende. 25Hai che straja le ștarenghi anda‐i reat avilo lende o Iisus, phirindos p‐o pai. 26Dichindos‐Les phirindos p‐o pai, Lesche ucenicea daraile, hai phende că si năluca, hai daratar astarde te den mui. 27Ta Ou sigo dea duma lența, phenindos: Îndrăznin, Me sem; na daran! 28Ta o Petro, boldindos‐Lesche, phendea: Devla, cana Tu san, poruncisar‐manghe te avau Tute p‐o pai. 29Ou phendea‐lesche: Au. Hai o Petro dinea‐pe tele anda‐i corabia, hai phirdea p‐o pai hai ghelo c‐o Iisus. 30Ta dichindos e barval, darailo, hai astardea te tasiol and‐o pai, ta dinea mui, hai phendea: Raia, hastrama! 31O Iisus dinea‐les vast, astardea‐les hai phendea: Ţîra tu cai pachias, anda soste îndoisailean? 32Uștindos and‐e corabia, acili e barval. 33Hai cola anda‐i corabia dine‐Lesche cocea, hai phende: Ceacimasa Tu san o Ciao le Devlesco. 34Hai nachindos închealtar, avile p‐o than le Ghenezaretosco. 35Hai pringiande‐Les ăl manuș othar dine drom andă sauără them ta ande sauără nasvalen. 36Hai rughinas‐Les numa te machen‐pe catar Lesche poghea; hai sea cai machenas‐pe Lestar sastionas.

15

O thoimos le vastengo. Ăc giuvli Canaaneanca. Ștar mii manuș si ceailiarde.

151Atunci avile catar o Ierusalimo, c‐o Iisus, ăl fariseia hai ăl sicadine, hai phende: 2Sostar Che ucenicea ușteaven e datina le phurengo? On ni thoven‐pe p‐ăl vast cana han marno. 3Ta Ou boldea, hai phendea‐lenghe: Ta sostar vi tume ușteaven e porunca le Devleschi, anda tumari datina? 4Că o Del phendea: Cinstisar che dades hai che da, hai sao dela armaia pe dades or pe da, te terminil merimasa. 5Ta tume phenen: Codoua sao phenela pe dadesche, or pe da che: Sosa daștiuas te ajutiv‐tu si o daro le Devlesco, 6Codoua ni cinstil pe dades or pe da; hai dinen rigate so phenel o Del anda tumari datina. 7Cior garade, mișto proorocisardea o Isaia anda tumende, cana phendea: 8«Cadal manuș cinstin‐Man le mosa, ta lengo ilo si dur Mandar. 9Hai si chanci că on cinstin‐Man, sichindos sicavimata so si porunci manușănghe». 10Hai dindos mui Peste le manușăn but, phendea‐lenghe: Așunen hai hachiaren: 11Na so ciol o manuș and‐o mui macril‐les hai so înclel anda o mui le manușăsco, codoia macril‐les. 12Atunci pașîle Leste Lesche ucenice, hai phende: Gianes c‐ăl fariseia, cana așunde so phendean, pedechisaile dă chio dimos duma, hai holeaile? 13Hai Ou boldea hai phendea: Orso răsado cai nas ciutino cathar Muro Dad opral, avel țîrdino anda‐i phuî. 14Muchen‐len; si manuș coră cai înghiaren avre corăn; hai cana ăc coro înghiarel avre corăs, el dui peren and‐ăc than hanado. 15Ta o Petro astardea hai phendea: Cher‐amen te hachiaras cadai pilda. 16Ou phendea: Acana i tume sen bi‐hachiarde? 17Ni hachiaren că sea so gial and‐o mui gial and‐o păr hai pala codoia des‐les avri? 18Hai cola so încalaves and‐o mui aven anda o ilo, hai codola macrin le manușăs. 19Anda o ilo înclen: ăl gîndurea ăl nasul, ăl mundarimata, ăl traimata avre giuvleasa, ăl buchea lajeaveste, ăl ciorimata, ăl phenimata ăl hohamne, ăl hule. 20Cadala si cai macrin le manușăs, ta te has le vastența bithode ni macril le manușăs. 21Înclindos othar o Iisus teleardea and‐ăl thana le Tirosche hai le Sidonosche. 22Hai eta c‐ăc giuvli Canaaneanca anda codol thana înclindos mui, hai phenelas: Aven‐Tu mila mandar, Devla, Ciao le Davidosco! Mîri cei nasul si chinuime catar ăc beng. 23Ou ni dea duma lasa chanci: Pașîndos, Lesche ucenice rughisarde‐Les, hai phende: Much‐la, că eta del mui pala amende. 24Ou boldea hai phendea: Nai sem dino drom numa c‐ăl bacrea ăl hasardea and‐o cher le Israelosco. 25Ta oi, avindos Leste, dinea cocea, hai phendea: Devla, na muchma. 26Ta Ou boldea hai phendea: Nai mișto te les o marno le ciauărănghe hai te ciudes‐les c‐ăl giuchel. 27Ta oi phendea: Cadea si, Devla, ta i ăl giuchel han and‐ăl prușuca cai pheren catar e sinia lenghe stăpînenghi. 28Atunci, boldindos, o Iisus phendea‐lache: Giuvlie, baro si chio pachiamos; cherdol‐pe tuche sar tu cames, hai sastil lachi cei andă codou ceaso. 29Hai nachindos o Iisus othar, avilo pașa o pai le Galileaco, uștilo p‐o plai, hai beșlo othe. 30Hai but manuș avile Leste, mașcar lende sas banghe, coră, aver ni denas duma, bi‐vastengo, but hai but ciute‐le cai Lesche pîrne, hai Ou sasteardea‐le. 31Codol but manuș mirinas‐pe dichindos colen cai ni dine duma acana denas duma, colen bi‐vastengo sastearde, ăl banghe phirenas, ăl coră dichenas, hai slăvinas le Devles le Israelosco. 32O Iisus, dindos mui Peste Pe ucenicen, phendea: Mila si Manghe catar cadal but manuș, că eta si trin ghesa dă cana ajuchearen pașa Mande hai nai so te han; te dau lenghe drom bocailo ni camau, caște na peren tele chinimastar. 33Hai ăl ucenicea phende‐Lesche: Cathar te avel‐ame, and‐ăl thana mulane, cadichi marne, te ceailiaras cadichi manuș? 34Hai o Iisus pușlea‐le: Cabor marne si tumen? Hai on phende: Efta hai țîra maciora. 35Poruncisardea le bute manușănghe te beșăn tele pe phuî. 36Lilea ăl efta marne hai codol mace, hai naisarindos, phaglea hai dinea că Pe ucenice, hai Lesche ucenicea le manușăn. 37Hai hale sea ta ceailile hai lile efta tîrne pherde sosa acilo h‐ăl prușuca. 38Hai codola cai hale ghindolaspe c‐ăl ștar mii murș, afer anda‐l ciauără hai ăl giuvlea. 39Pala cadaia dinea o drom codol manușănghe, uștilo and‐ăc corabia hai ghelo and‐ăl thana Magdala.

16

Ăl nișan le ghesenghe. O aluato le fariseengo. E mărturia le Petroschi. O anunțo le Pătimengo. Sar te gias pala o Hristoso.

161Pașîndos ăl fariseia hai ăl saducheia te ispitin‐Les mangle Lesche, te sicavel ăc nișan opral and‐o cero. 2Ta Ou boldea hai phendea‐lenghe: Cana cherdol reat, phenen: Tehara si te avel ghes lacio, că o cero si lolo. 3Hai dătehara phenen: Aghes si te avel bari barval, că o cero si lolo-mîhnome. Sen cior garade, o ceri gianen te judechin, ta ăl nișan cai si te aven ni daștin. 4Neamo vicleano hai mahrime manghel ăc nișan, ta ni dela‐pe les aver nișan, numa o nișan le Ionasco. Hai muchlindos‐les, teleardea. 5Lesche ucenicea avindos părdal o pai, bistarde te len marne. 6Hai o Iisus phendea‐lenghe: Len goghi te garadion catar o aluato le fariseengo hai le saducheengo. 7Hai on gîndinas‐pe andă peste hai phenenas: Cadaia că ni lileam marno. 8Ta o Iisus, cai pringianelas so gîndin, phendea: So godisaren andă tumende, cadea țîra pachiamos, si tumen că ni lilen marno? 9Sa ni hachiaren, hai nici ni aven tumenghe goghi catar c‐ăl pangi marne, c‐ăl pangi mii manuș, hai cabor tîrne lilen? 10Nici ăl efta marnendar ăl ștar mii manușa hai cabor tîrne lilen? 11Sar ta ni hachiaren că na and‐o marno phendem tumenghe? Hai te garadion catar o aluato le fariseengo hai le saducheengo. 12Atunci hachiarde că ni phendea‐lenghe te garadion catar o aluato le marnesco, numa catar o sicaimos la fariseengo hai le saducheengo. 13Hai avindos o Iisus and‐ăl thana e Cezareea le Filiposchi, pușlea Pe ucenicen cadea:

Con phenen ăl manuș că sem Me, o Ciao le Manușăsco? 14Hai on bolde‐Les: Niște manuș phenen o Ioano o Bolitori, aver o Ilia, aver o Ieremia or ech and‐ăl proorocea. 15Hai Ou phendea‐lenghe: Ta tume con phenen că sem? 16Boldindos, o Simon Petro phendea: Tu san o Hristoso, o Ciao le Devlesco o giungado. 17O Iisus boldea hai phendea: Mișto tutar Simone, ciao le Ionasco, că na o corpo hai o rat cherde te gianes cadai buchi, numa Muro Dad cai si opre and‐o cero. 18Hai Me phenau tuche că tu san o Petro, hai pă cadaua bar vazdaua Mîrî Cangheri hai ăl udara le iadosche ni biruina‐la. 19Tut daua‐tu ăl chei le thagarimasche and‐o cero, hai orso phandesa pe phuî avela phanglo i and‐o cero, hai orso deschearesa pe phuî avela descheardo i and‐o cero. 20Atunci poruncisardea Pe ucenicenghe te na phenen canicasche că Ou si o Hristoso. 21Dă othar astardea o Iisus te sicavel Pe ucenicenghe că Ou trăbuil te gial c‐o Ierusalimo, te pătimil but catar ăl phure hai ăl rașaia hai ăl sicadine hai te avel mundardo, hai c‐ăl trin ghesa te giuvindol. 22Ta o Petro lea‐Les and‐ăc rig hai astardea te mustrol‐Les, phenindos‐Lesche: Avel‐tu mila Tutar, te na areses te cheren‐Tuche cadea. 23Hai Ou boldea hai phendea le Petrosche: Nach pala Mîră, zeia bengana. Tu san Manghe ăc pedeca, tu ni gîndis c‐ăl buchea le Devlesche, numa c‐ăl buchea le manușănghe. 24Atunci o Iisus phendea Pe ucenicenghe: Cana camel da coniva te avel pala Mande, te ciudel‐pe pestar, te lel pio trușul hai te avel pala Mande. 25Că sao camela te hastral pio ghi, hasarela‐le, hai sao hasarela pio ghi anda Mande, va lela‐le parpale. 26Că so si and‐ăc manuș te lel sauără lume hai te hasarel pesco ghi? Or so delas o manuș and‐o than pesco ghi? 27Că o Ciao le Manușăsco si te avel and‐o barimos Lesche Dadesco, Lesche îngerența; atunci pochinela fie saves pala so cherdea. 28Ceaces phenau‐tumenghe: Si manuș cai beșăn acana cathe cai nai te dichen o merimos, gi cai ni dichena le Ciaves le Manușăsco avindos andă Pio thagarimos.