O mas ašilo katal jertfe.
1 Ande so dikhăl le butea jertfime le idolengă, jeanas saoŕă kă same prinjeandimos. Ta o prinjeandimos phutearăl ta o kamblimos vazdel.
2 Kana pateal varekon kă jeanel vareso, înkă či prinjeandea sar trăbul te prinjeanel.
3 Ta kana kamel varekon le Devlles, sî prinjeando le Devllestar.
4 Kadea, sode poa xabe jertfime le idolengă, jeanas kă ande lumea khă idolo sî sa iekh khančesa, thai kă nai dă sar khă korkoŕo Dell.
5 Kă orta kana te avino kadea dinoanau „devlla”, avena ando čerii, avena pe phuw (sar i sî ande čeačimaste but „devlla” thai but „rai”),
6 varesar anda amende nai numai khă Dell korkoŕo: o Dadd, kastar aven sa le butea thai anda kaste traisaras i ame, thai ăkh Rai korkoŕo: o Isus Kristoso, anda kaste sî sa le butea thai ande Leste i ame.
7 Ta na sa sî le o prinjeandimos kadoa.Ta iekh, avindoi sîkade ji akana le idolosa, xan khă buti sar avindoi jertfime khă idolohkă; thai lengo dii, kai sî kovlo, sî marime.
8 Ta na o mas kărăl ame amen čeailine le Devllestar: či las khanči kana xas anda leste, thai či xasaras khanči kana či xas.
9 Len sama ta na varesar kadoa slobozîmos tumaro te arăsăl ăkh baŕ ambladimahko anda kola le kovle.
10 Kă kana dikhăl tu varekon tut, kai sî tu prinjeandimos kă bešes kai skafidi andekh templo idolengo, lehko dii, kai sî kovlo, či spidela les andal butea jertfime le idolengă?
11 Thai kadea, o, kai sî kovlo, xasaola andai doši kadale prinjeandimahko tirăhko: o, o phral, anda sao mullo o Kristoso.
12 Kana bezexarăn kadea pal phral, thai dukhaven lengo înjero o kovlo, bezexarăn poa Kristoso.
13 Anda kodea, kana khă xabe kărăl te phrales te bezexarăl, či xaua čiăkhdata mas, kaste na kărau mîŕă phrales te bezexarăl.