O dimosanglal le Iovohko.
1 O Iov lea o divano thai phendea:
2 Uf! te avilino daštimasa te thol pe ando toll mîŕî dukh,
thai te thon pe mangă sal bibaxtalimata ando toll,
3 sahkă aven mai phară sar e tišai la mareati:
anda kodea jean mangă le divanuri ji koa čeladimos!
4 Kă le săjeçi Kolehkă Aseazuralehkă pusade ma,
o dii muŕo pel lendi otrava,
thai dar le Raiesti šol šudrimata ande mande!
5 Zberîl o čiuši o văšuno kana sî les zălenimos?
Çîpil o guruw kana sî les xamahko?
6 Dašti te xas so sî bi gustohko thai bi lonehko?
Sî les vokh gusto le parnimos le anŕăhko?
7 Or savi buti saveatar či kamaua te azbau ma,
kodoa sî muŕo xabe, or sode avela dă sîloso o!
8 O, te ašundeola pe muŕo kamimos,
thai te pherăla o Dell muŕo ajukărimos!
9 Te kamela o Dell te linčearăl ma,
te tinzol Pehko vast thai te mudarăll ma!
10 Ašela ma barim kadoa lašimos,
kadoa bukurimos andel dukha savença delma:
kă či ăkhdata či ušteadem le
mothodimata Kolehkă le Sfîntohkă.
11 Ka soste te mai ajukrau kana či mai naštisarau?
Ka soste te mai ajukărau, kana jeangleol pe o gor?
12 E zor mîŕî sî khă zurallimos baŕăhko?
O stato muŕo sî xarkumako?
13 Či sîm me bi kandimastar,
thai či našlo o skăpimos mandar?
O Iov vatil pe.
14 Kukoa kai dukhaol sî les čeačio kai milla le amalesti,
orta kana e dar mekăles Kolestar Asa zurallestar.
15 Mîŕă phral sîkadi'le athadimahkă sar khă paioŕo,
sar e albia le paiendi kai nakhăn.
16 Khă kotorpaohko biujară lengo thawdimos,
o iw gomilil pe pa lende;
17 avel o phabarimos le millahko thai šuteol,
avel o tatimos le khamehko, thai šuteon lendi albia.
18 Kîrduri phirimatorengă den pe rigate anda lengo drom,
thai xasaon ande pustia thai merăn.
19 Le kîrduri kolengă andai Tema dikhăn orta pe lende,
le phiritorea andai Seba sî pherde
ajukărimos kana dikhăn le.
20 Ta ašen athade ande ajukărimos Lengo,
thai ašen mirime kana arăsăn lende.
21 Kadea san i tume akana anda mande.
Tume dikhăn muzŕo năkazo, thai daraon!
22 Phendem tumengă me kadea: „Den ma vareso,
potinen andal mandina tumară anda mande,
23 skăpin ma andoa vast le dušmanohko,
potinen ma andoa vast le jungalengo?”
24 Sîkavena ma, thai ašeauamuto;
kărăn ma te atearau ande soste bezexardem.
25 O sode dă bimeklimahkă sî le divanuri le čeačimahkă!
Ta so čeačearăn le xamata tumară?
26 Kamen te den mangă duma anda sa so phendem,
thai te na dikhăn dă sar bravall andel divanuri
khă biajukărdimatorehkă?
27 Tume či kărăn čeačimos le bidaddehkărăs,
Našaven tumară amales.
28 Dikhănta amande, rudi tume!
Ta či xoxavaua tume anglal!
29 Ambolde tume, na aven bičeače;
ambolde tume thai phenen kă sîm bidošallo!
30 Sî vokh bikris pe šib Mîŕî,
thai či lel sama muŕo mui so sî nasul?