O dimosduma le Bildadohko.
1 O Bildad andoa Šuax lea o divano thai phendea:
2 „Ji kana kames te desduma kadea,
thai ji kana avena le divanuri te mohkă
sar khă bravall zurali?
3 Ta delamuial o Dell o čeačio?
Or delamuial Kukoa Aseazurallo o čeačimos?
4 Kana te šave bezexarde pa Leste,
dea le po vast la bezexako.
5 Ta tu, kana prastes koa Dell,
kana rudis Koles Asa zuralles,
6 kana tu san ujo thai bibezexako,
atunčeara biathadimahko, O dikhăla pa tute,
thai dela tu parpale o baxtalimos le bešlimahko tiro bidošalo.
7 O purano tiro vazdimos avela çîkno
angla kukoa dă mai palal.
Le sîkadimata anda o nakhlimos kolengo dăanglal.
8 Pušta kolen andal Viçe kai nakhle,
thai le godi koa nakhlimos lengă daddengo.
9 Kă ame sam dă arateara, thai či jeanas khanči,
amară des pe phuw nai dă sar khă ušal.
10 On sîkavena tu, deana tukă duma,
thai ankalavena anda lengo illo kadala divanuri:
11 Bareol e papura bi baltako?
Bareol e trăstia bi tindimahko?
12 Avindoi înkă zăleno thai bi te šindeol,
oi šuteol mai iekhatar dă sar sal čearea.
13 Kadea kărdeol pe sa kolengă kai bîstrăn le Devlles,
thai o ajukărdimos kolehko bikrisako xasaola.
14 O pateamos lehko sî linčeardo,
thai o nikărimos lehko sî khă poxtan talanohko.
15 Nikrăl pe po khăr lehko, ta nai zurallo;
astardeol lestar; ta či nikră les.
16 Sar del o kham, zălenil,
tinzol pehkă ŕaia pai baŕ pesti,
17 akhuwel pehkă anglunimata maškar
le baŕ, arăsăl ji kal zîduri.
18 Ta te çîrdesa les anda lehko than kai bešel,
o than kadoa šudel pe lestar, thai phenel:
„Či jeanau te prinjeandino tu vokhdata!”
19 Dikta, kadea sî le čeailimata kai anel lehkă le droma lehka čivavakă;
pala kodea sa anda kodea phuw lulludearăn aver pala leste.
20 Či, o Dell či šudel pe le manušestar bi bezexako,
thai či arakhăl kolen le jungalen.
21 Ta înkă, O perăl teo mui çîpimatănça bukurimahkărănça,
thai le ušt dilabaimatănça vesălimahkărănça.
22 Le dušmaia tiră avena pherdine lajavestar,
ta e çăra kolendi le jungalendi xasaola.”