1 Sa kadea, romneale, aven mekline i tume tumară romengă; anda kă, kana iekh či ašunel o Divano, te aven line bi divanohko, andoa phirimos pehkă romneango,
2 kana dikhăna o fealo tumaro le traiohko: ujo thai darasa.
3 O šukarimos tumaro te na avel o šukarimos dă avreal, kai bešel ando akhuvdimos le ballengo, ando phiraimos buteango sumnakune or ando xureaimos le çoalengo,
4 ta te avel o manuši o garado le illehko, ando ujimos bixasardo khă duxohko kovlo thai ujeardino, kai sî baro kučimahko angloa Dell.
5 Kadea xureavenas pe averdata le sfinçome juwlea, kai pateanas ando Dell, thai sas tala o vast pehkă romengă;
6 Sar e Sara, kai ašunelas le Avraamostar, thai phenelas lehkă „o rai lako.” Le šeia lakă kărdilean tume, kana kărăn o lašimos bi te daran varesostar.
7 Romale, phiraven tume i tume, koa rîndo tumaro, godeasa tumară romneança, dindoi pativ la juwleakă kai sî khă vaso mai kovlo, sar iekha kai lena andekhthan tumença o xaro la čivavako, kaste na aven lopînzîme le rudimata tumară.
8 Întea, saoŕă te aven sa kodole gîndurença, atearindoi le kolavrănça kamblindoi sar le phral, milasa, mekline.
9 Na ambolden nasul anda nasul, či prasaimos anda prasaimos; avervaresar, dendumadămišto, kă ka kadea sanas akhardine: te len o dinodumadămištimos.
10 „Kă kon kamel pesti čivava, thai kamel te dikhăl des laše, te lopînzîl pesti šib katoa nasul, thai le ušt katal divanuri le athadimahkă.
11 Te durearăl pe katoa nasul thai te kărăl o mištimos, te rodel e pačea, thai te phirăl pala late.
12 Kă le iakha le Raiehkă sî pa kola le bibezexale, thai le kan Lehkă len sama ka lengă ŕudimata. Ta o Mui le Raiehko sî pe kodola kai kărăn nasul.”
13 Thai kon kărăla tumengă nasul, kana san pherde kărimos andoa mištimos?
14 Orta te avela tume tinuimahko andoa bibezexalimos, baxtale tumendar! Na avel tume či khă dar lendar, thai na biujearăn tume!
15 Ta sfinçîn ande tumară ille le Kristosos sar Rai.” Aven orkana gata te den orkas anglal orkas mangăl tumengă dindimos andoa ajukărimos kai sî ande tumende; ta lašimasa thai darasa,
16 avindoi tume khă godi uji; anda kola kai pupuin o phirimos tumaro o lašo ando Kristoso, te ašen lajavehkă orta andel butea kai den tume duma dă nasul!
17 Kă sî mai mišto, kana kadea sî o kamimos le Devllehko, te kăsnin kă kărăn o mišto dă sar anda kă kărăn o nasul!
18 O Kristoso, sa kadea, kăsnisardea ăkhdata andal bezexa, O, Kukoa o bibzexalo, anda kola le bezexale, kaste anel ame koa Dell. O sas mudardo ando stato, ta juvindisardea ando duxo,
19 ande sao gălo te delduma le duxurengă ando phandaimos,
20 kai sas vazdine averdata, kana o but ŕăbdimos le Devllehko sas ando ajukărimos, andel des le Noiahkă, kana kărdeolas o bero, ande save sas skăpisarde andoa pai kă çîkno dindimos diengo, thai anume oxto.
21 E ikoana kadea le dičimasti skăpil tume akana tumen, thai anume o boldimos, kai nai khă ujimos andal marimata le statohkă, ta o phendimos khă godeako uji angloa Dell, ando juvindimos le Isus Kristosohko,
22 kai bešel ande čeači rig le Devllesti, pala so vazdinisai'lo koa čerii, thai thodea tala Peste le înjerea, le stăpînimata thai le zora.