O divano le Devllehko karing o Asa.
1 O Duxo le Devllehko avilo poa Azaria, o šeau le Odedohko,
2 thai o Azaria gălo angla o Asa, thai phendea lehkă: „Ašun ma, Asa, thai soa Iuda thai o Beneamino! O Rai sî tumença kana tume san Lesa; kana rodena Les, arakhăna Les; ta kana mekăn Les, i O mekăla tume.
3 But čiro o Israelo sas bi le Devllehko kolehko le čeačehko, bi rašahko kai te sîkavel le manušen, thai bi krisako.
4 Ta ando maškar le strandimahko lengo amboldi'le koa Rai, o Dell le Israelohko, rodine Les, thai arakhle Les.
5 Andel čiruri kodola, nas ujeardimos anda kukola kai jeanas thai kai avenas, kă sas bară biujimahkă maškar sal manuši le čemehkă;
6 khă poporo marălas pe khă avră poporosa, khă četatea avrea četateasa, anda kă o Rai biujearălas le sakho fealosa strandimatahkă:
7 tume kadea, zureaon, thai na mekăn tume te kovleon tumară vast, kă le kărdimata tumară avela le khă potindimos.”
E rîvna le Asasti.
8 Pala so ašundea kadala divanuri thai o prooročimos le Odedohko, le proorokohko, o Asa zureai'lo thai dureardea le prikăjimata anda soa čem le Iudahko thai le Beneaminohkothai anda sa le četăçi kai leasas le andoa baŕbaro le Efraimohko, thai neveardea o altarii le Raiehko kai sas angla o pridvori le Raiehko.”
9 Tidea sa le Iudas thai le Beneaminos, thai kolen andoa Efraimo, andoa Manase, andoa Simion, kai bešenas maškar lende, kă khă baro dindimos anda le manuši le Israelohkă nakhlinesas lende kana dikhline kă o Rai, o Dell sas lesa.
10 Tide pe ando Ierusalimo ando šon o trito le băršehko dešpanji le raimahko le Asahko. Ando des kadoa,
11 jertfisarde le Raiehkă, anda o valoso kai line sas les: efta šella guruwengă thai efta šella bakreangă.
12 Kărdine phanglimos te roden le Raies, le Devllehkă lengă daddengă, andoa soa illo thai anda sa lengo duxo;
13 thai orkon či rodelas le Raies, le Devlles le Israelohkărăs, trăbulas mudardo, te avino çîkno te avino baro, te avino murši te avino juwli.
14 Solaxade pateaimos le Raiehkă, muiesa zuralo, çipmatănça bukurimahkă, thai bašaimos anda le šing thai anda le bučiume;
15 soa Iuda bukurisai'lo anda e solax kadea, kă solaxadesas anda soa illo lengo, rodesas le Raies anda lengo lašo kamimos, thai arakhlesas Les. Thai o Rai dea le xodinimos anda sal riga.
16 O thagr o Asa či muklea orta či pehka deia la Maaka te mai avel thagarni, anda kă kărdeasas khă idolo la Astarteiakă. O Asa dea tele lako idolo, kai kărdea les poši, thai phabardea les paša o nanilaši o Chedrono.
17 Ta le učimata sa nas dureardine andoa Israelo, barem kă o illo le Asahko sas ande sa le Raiehkă ande soa čiro lehka čivavako.
18 Thodea ando Khăr le Raiehko le butea thodine le Raiehkă lehkă daddestar thai orta lestar: rup, sumnakai thai vasuri.
19 Nas či khă mardimos ji ando treanda thai panji bărši le raimahko le Asahko.