O dikhlimos le neve Ierusalimohko.
1 Ando biši thai panjto bărši le robimahko amarăhko, koa anglal le băršehko, ando des o dešto le šonehko, ka dešuštar bărši pala o peraimos la četateako, orta ando des kodoa, avilo o vast le Raiehko pa mande, thai nigărdea ma ando čem le Israelohko.
2 Nigărdea ma oče, ande varesar dikhlimata devllikane, thai thodea ma pe khă baŕbaro but učio; karingavelodes kadale baŕbarăhko sas vareso sar khă četatea vazdini.
3 Nigărdea ma oče; thai dikta kă oče sas khă manuši, savehko ameaimos sas sar o ameazaimos la xarkumako; les sas les ando vast khă šello măsurimahko, inohko, thai khă rowli măsurimasti, thai bešelas koa udar.
4 O manuši kodoa phendea mangă: „Šeau le manušehko, dikh te iakhănça, ašun te kanença, thai le godi ka sal butea, kai sîkavaua tukă le; kă sanas andino koče kaste sîkavau tukă le. Kăr prinjeando le khărăhkă le Israelohkă sa so dikhăsa.”
5 Khă zîdo delasangali o Templo dă avreal rigatar peste sa. Ando vast le manušehko kodolehko sas khă rowli măsurimasti lungo dă šov koçea, sako koto sas les khă palma mai but dă sar o koto prinjeandino. Măsurisardea o bufllimos le zîdohko, kai sas dă khă rowlli, thoa učimos sas sa kha rowleako.
6 Gălo koa udar le lulludearimahko, thai ankăsto lehkă skării. Măsurisardea o prago le udarăhko, kai sas bufllo dă khă rowlli, thai o kolaver prago kai sas bufllo dă khă rowlli.
7 Sakogodi osdaia le arakhaimasti sas lungo dă khă rowlli, thai buflli sa dă khă rowlli.
8 Măsurisardea i e tinda le udarăsti dă andral; sas dă khă rowlli.
9 Măsurisardea pala kodea e tinda le udarăstii; sas dă oxto koçea, thai le tille sas dă dui koçea. E tinda le udarăsti sas karing e rig dăandral.
10 Le odăii le arakhaimahkă le udarăhkă le lulludearimahkăsas ando dindimos dă trin pe khă rig thai trin pe kolaver; sa litrin sas le sa kodoa măsurimos, thai le tille dă sako rig sas le sa kodoa măsurimos.
11 Măsurisardea pala kodea o bufllimos le pîtărimahko le udarăhko, kai sas dă deši koçea, thai o lunjimos le udarăhko, kai sas dă dešutrin koçea.
12 Anglal odăii le arakhaimahkă sas khă thannango dă khă koto ande khă rig thai ande kolaver; sako odaia arakhaimasti sas la po šou koçi ande khă rig, thai šou koçi ande kolaver rig.
13 Măsurisardea o udar kata o koperišo kha odaiako arakhaimahkăreako, ji koa koperišo la kolavreako; maškar kola dui pîtărdimata kai sas mui muieste sas khă bufllimos dă biši thai panji koçea.
14 Măsurisardea e tinda le udarăsti la bareati thai arakhlea biši thai oxto koçea; e tinda delas ande khă bar, dă rigatar le rigatar le udarăhko.
15 O than kata o udar maškar o šutimos thai tinda le udarăsti dă andral sas lungo dă panvardeši koçea.
16 Kal odăii le arakhaimahkă thai kal tille lengă dă andral le udarăhko dă rigatar la rigatar sas varesar jeamuri tidine; le jeamuri sas i andral le tinzăngo le udarăngo dă rigatar la rigatar; ta pel tille sas xunade ŕaia finikurengă.
17 Nigărdea ma ande bar dă avreal, kai arakhadeonas odăi thai khă kaldarîmo rigatar la rigatar; po kaldarîmo kadoa sas treanda thai dui odăi.
18 O kaldarîmo sas pašal udara, thai sas ando lunjimos le udarăngo: kadoa sas o kadarîmo dă telal.
19 Măsurisardea o bufllimos katoa udar dă telal ji kai rig dă avreal la bareati dăandral, thai sas les ăkh šell koçea, karing lulludearăl thai karingavelereat.
20 Măsurisardea o lunjimos thai o bufllimos le udarăhko kataravelereat la bareako dă avreal.
21 Le odăi lakă le arakhaimahkă, ando dindimos dă trin pe khă rig thai trin pe kolaver, le tille thai tinda lati, sas le sa kodoa măsurimos sar o udar dă anglal, panvardeši koçea ando lunjimos thai biši thai panji koçea ando učimos.
22 Le jeamuri lehkă, e tinda lesti, le finičea lehkă, sas le sa kodoa măsurimos sar o udar le lulludearimahko; anklesas leste pe efta skării, ta e tinda lesti sas pe rig dă andral.
23 Kai bar dă andral sas khă udar, angloa mui le udarăhko kataravelereat thai angloa mui le udarăhko kata o lulludearimos; măsurisardea ăkh šell koça kata khă udar ji koa kolaver.
24 Nigărdea ma ande rig kataravelodes, kai arakhadeolas pe o udar kataravelodes, măsurisardea lehkă tile thai tinda, kai sas le sa kodoa măsurimos.
25 O udar kadoa thai tinda lesti sas le jeamurea rig rigatar, sar i le kolaver jeamuri, thai o udar sas lungo dă panvardeši koçea thai bufllo dă biši thai panji koçea.
26 Leste anklesas pe khă skara efta skărendi, ta e tinda lesti sas ande rig dă andral; pe le tille sas po khă finiko ande sako rig.
27 E bar dă andral sas la khă udar karingavelodes; măsurisardea kata khă udar ji koa kolaver karingavelodes ăkh šell koçea.
28 Nigărdea ma ande bar, po udar karingavelodes. Măsurisardea o udar kataravelodes, thai arakhlea kă sas les sa kodoa măsurimos.
29 Le odăii lakă le arakhaimahkă, le tille thai lesti tinda, sas le sa kodoa măsurimos. O udar kadoa thai tinda sas le jeamurea rig rigatar, thai o udar sas lungo dă panvardeši koçea thai bufllo dă biši thai panji koçea.
30 (Dă rigatar sas tinde lunji dă panvardeši thai panji koçea thai buflle dă panji koçea.)
31 E tinda le udarăsti delas ande bar dă andral; pel tille lehkă sas finičea, thai oxto skării andoa ankăstimos koa udar.
32 Nigărdea ma pala kodea ande bar dă andral, po šutimos le lulludearimahko. Măsurisardea o udar, thai arakhlea kă sas les sa kodoa măsurimos.
33 Le odăii lehkă le arakhaimahkă, le tille lehkă, thai e tinda lesti sas le i len jeamuri dă rig rigatar, lunji dă panvardeši thai panji koçea thai buflle dă biši thai panji koçea.
34 E tinda delas ande bar dă avreal; ande sako rig sas finikurea pe le tille, thai oxto skării andoa ankăstimos koa udar.
35 Nigărdea ma koa udar kataravelereat. Măsurisardea les, thai arakhlea sa kodoa măsurimos.
36 Thai i les sas les odăi arakhaimahkă, tille, tinda thai jeamuri rig rigatar; sas lungo dă panvardeši thai panji koçea thai buflle dă biši thai panji koçea.
37 E tinda delas ande bar dă avreal; ande sako rig sas finikurea pe le tille, thai oxto skării andoa ankăstimos koa udar.
38 Sas khă odaia, kai pîtrălas karing e tinda le udarăsti; oče trăbunas xaladine le phabarimata dă sa.
39 Ande tinda le udarăsti sas ande sako rig po dui skafidea, pe save trăbulas dinošuri o phabarimos dă sa, e jertfa le skăpimasti thai e jertfa andai doši.
40 Ande iekh anda le riga dă avreal, sar ankles koa šutimos le udarăhko kataravelereat, sas dui skafidea; thai ande kolaver rig, sas pale dui skafidea.
41 Ande kola dui riga le udarăhkă, arakhadeonas pe kadeadar štar skafidea pe khă rig thai štar skafidea pe kolaver rig, dă sea oxto skafidea, pe save trăbunas dinešuri le jeŕtfe.
42 Angla le skafidea andal jertfe, mai sas andal phabarimata dă sa štar skafidea baŕăhkă čioplimenea, lunji khă kotohkă thai dopaši, bufllea khă kotohkă thai dopaši, thai uče dă khă koto; pe le skafidea kadala trăbunas thodine le butea savença denaspešuri le jiwine anda le phabarimata dă sa thai andal kolaver jertfe.
43 Andral o khăr sas les laviçuri khă vastehkă dă buflle, kai kandenas sar skafidea anda o mas le jertfengo.
44 Avri andoa udar dăandral sas dui odăi anda le dilabaitorea andai bar dă andral: iekh sas paša o udar kataravelereat thai sas la o mui karingavelodes, e kolaver sas paša o udar kataravelodes thai sas la o mui karingavelereat.
45 O phendea mangă: „E odaia kadea, karingavelodes, sî anda le raša kai kanden o kandimos le Templohko.
46 Ta e odaia karingavelereat sî anda le raša kai kanden andoa kandimos le altarehko. Le šave le Çadakohkăsî kola kai, andal šave le Levehkă, pašon le Raiestar, kaste kanden les.
47 Măsurisardea e bar, kai sas ande štar kolçuri, lungo dă khă šell koçea. O altarii sas angloa khăr.
48 Nigărdea ma ande tinda le khărăsti. Măsurisardea le tille la tindakă, thai arakhlea panji koçea ande khă rig, thai panji koçea ande kolaver rig.
49 E tinda sas la khă lunjimos dă biši thai panji koçea thai khă bufllimos dă dešudui koçea; anklesas late pe deši skării. Paša le tille mai sas i aver tille, iekh kha rigatar thai o kolaver avreatar.