1 „Thai tu, šeau le manušehko, le khă sabia askuçome, lella sar bričio ŕanglimahko, thai nakhav la poa šero thai pai šur. Le pala kodea khă kumpăna tollosti, thai xulav le ball.
2 Khă trirto anda lende phabarla ande iag, ando maškar la četateako, kana pherdeona le des le phanglimatahkă; khă trito lela thai šinla la sabiasa ande sal riga la četateakă; ta khă trito phaŕavla ande bravall, kă çărdaua e sabia pala lende.
3 Ta le varesar le firea anda lende, thai tidele ande podi tea raxameati.
4 Anda kadala te mai les varesar vareso, te šudes le ande iag thai te phabarăs le ande iag. Anda lende anklela khă iag pa soa khăr le Israelohko.
5 Kadea delduma o Rai, o Dell: „Kadoa sî o Ierusalimo! Me thodemas les ando maškar le neamurengo thai anda sal riga lehkă sî čema.
6 Ta o amboldinisai'lo pa le krisa thai le mothodimata Mîŕă, thai kărdi'lo mai došalo dă sar le neamuri thai le čema lehka rigatar; kă či dindea le krisa Mîŕă, či phirdea palal mothodimata Mîŕă.
7 Anda kodea, kadea delduma o Rai, o Dell: Anda kă sanas mai muithulle dă sar le neamuri kai dentumeroata; anda kă či phirdean palal mothodimata Mîŕă, thai či kădean barem či palal krisa le neamurengă kai dentumeroata;
8 andai doši kadea, kadea phenel o Rai, o Dell: „Dikta kă sî ma xolli pe tute, thai annau koa pherdimos ande teo maškar le krisa Mîŕă, talal iakha le neamurengă.
9 Andai doši sa le prikăjimatăngo tirăngo, kăraua tukă so či kărdem čiăkhdata, thai čina či mai kăraua vokhdata.
10 Anda kodea le dadda xana pehkă šaven, ando maškar tiro, thai le šavoŕă xana pehkă dadden; pheraua Mîŕă krisa pa tute, thai phaŕavaua ande sal bravallea sa kolen kai mai ašena anda tute.
11 Anda kodea, pe Mîŕî čivava! Phenel o Rai, o Dell: anda kă marisardean Muŕo than kukoa o sfînto sa le idolença thai le prikăjimatănça tirănça, i Me amboldaua Mîŕă iakha tutar; Mîŕî iakh avela bi millako, thai či falamanasul.
12 Khă trito andal bešlitorea tiră merăna čiumatar, thai avena xasarde bokhalimatar ando maškar tiro: khă trito perăla mudardo sabiatar angla tute; thai khă trito phaŕavaua les ande sal bravallea, thai ankalavaua e sabia pala lende.
13 Atărderaua kadea Mîŕă xolli, atărdearaua kadea Mîŕî arman lença, thai vazdaua Ma, kaste jeanen kă Me, sîm o Rai, demduma ande xolli Mîŕî, šordindoi Mîŕî arman pa lende.
14 Paruvaua tu ande khă pustiimos, kăraua tu prasaimahko maškar le neamuri kai denturaoata, angla sa le nakhlitorea.
15 Arăsăsa prasaimahko thai lajawehko, avesa khă pilda thai khă daraimos andal neamurea kai denturoata, kana anaua koa pheromos le krisa Mîŕă pa tute, xolleasa, armaiasa thai došalimatănça zuralle, – Me, o Rai, phenau, – kana šudaua pa lende le săjeçi le xasardimahkă le bokhalimahkă, kai den o merimos, thai save tradaua le te xasarăn tume.
16 Kă kal bibaxtalimata tumară mai thoaua i o bokhalimos, thai linčearaua tumengă e rowlli le manŕăsti.
17 Tradaua pa tumende na dă sar e bokh, ta i le jiwine le văšune, kai mekăna tume bi šavengo. E čiuma thai o šordimos le ratehko nakhăna anda teo maškar: anaua pa tute i e sabia. Me, o Rai, dauduma.”