O Isaia ando kandimos.
1 Ando bărši le mullimahko le thagarehko Ozia, dikhlem le Raies bešlindoi pe khă skamin raimahko but učio, thai le podea Lehka raxameakă pherănas o Templo.
2 Le serafimea bešenas opral pa Leste, thai sas le sogoden po šou phaka: duiença garavenas pehko mui, duiença garavenas pehkă pînŕă, thai duiença xureanas.
3 Çîpinas iekh avrăste, thai phenenas: „Sfînto, sfînto, sfînto sî o Rai le oštirengo! Sai phuw sî pherdi Lehkă barimastar!”
4 Thai izdranas le pragurea le udarăhkă andoa mui kai ašundeolas pe thai o khăr pherdi'lo thuw.
5 Atunčeara phendem: „Au mandar! Sîm xasardo, kă sîm khă manuši uštença biujearde, bešeau ando maškar khă poporohko sa le uštença biujearde, thai dikhlem mîŕă iakhănça le Thagares, o Rai le oštirengo!”
6 Ta iekh andal serafimea xureai'lo karing mande khă angarăsa astardo ando vast, kai leasas les le kleašteosa poa altarii.
7 Azbadea muŕo mui lesa, thai phendea: „Dikta, azbadindoi pe o angar kadoa te uštendar, e bikris tiri sî dureardi thai e bezex tiri sî iertime!”
8 Ašundem o mui le Raiehko, pušlindoi: „Kas te tradau, thai kon jeala anda Amende?” Me demanglal: „Dikta ma, trade ma!”
9 O phendea atunčeara: „Jea thai phen le poporohkă kadalehkă: „Andeiekh sa ašunena thai či atearăna; andeiekh sa dikhăna, thai či prinjeanena!”
10 Baŕar o illo kadale poporohko, kărles zurallo kanendar, thai garav lehkă iakha kaste na dikhăl le iakhănça, te na ašunel le kanença, te na atearăl le illesa, te na amboldel pe Mande, thai te avel sasteardo.”
11 Thai me pušlem: „Ji kana, Raia?” O deanglal: „Ji kana ašena le četăçi pustii thai bi manušengo; ji kana či mai avela khonikh andel khăra, thai o čem ašela pusto dă sa;
12 Ji kana durearăla o Rai le manušen, thai o čem ašela khă marea pusto.
13 Thai orta o dešto rig te mai ašela anda le bešlitorea, avena xasardine i on ka pehko širo. Ta, pala sar o terebinrto thai o stejarii nikrăl pesti bučiuma anda o angluminos, kana sî šindine, sa kadea, khă sămînça sfînto kărdeola pe pale andoa poporo kadoa.”