O dimosanglal le Iovohko.
1 O Iov lea o divano thai phendea:
2 „Kadalendar butea ašunde me butivar;
tume sa san vareasr răzgăitorea xollearimahkă.
3 Kana arăsăna koa gor kadala orbe ande bravall?
Thai anda soste kaditi xollearimos ande le dimatanglal tiră?
4 Sar tumende sahkă dauduma i me,
te avino ande muŕo than?
Sahkă pherau tume orbença,
daua andoa šero tumengă,
5 sahkă răzgăi tume le mosa,
thai sahkă mišti andal ušt,
kaste lesni tumari dukh?
6 Kana dauduma, e dukh či nakhăl,
ta kana ašaumuto, sosa çîkneol?
7 Ta akana, au! O strandisardea ma zorăndar…
Mekhlean pusto sa muŕo khăr!
8 Azbadean ma, sar khă došales;
O čečimos muŕo šutimos,
kai vazdel pe thai došarăl ma ando mui.
9 Šinel ma thai phirăl pala mande ande Pesti xolli,
tidel andal dandd pa mande,
malavel ma thai pusavel ma
Lehkă dikhlimasa.
10 On pîtrăn o mui kaste xan ma,
prasan ma thai marăn ma pal buči,
xolleaon saoŕă pa mande.
11 O Dell mekăl ma koa lašo lengo čeailimos
thai kolerngo bikrisako,
thai šudel ma andel vast kolengă le jungalengă.
12 Sîmas ujeardo, thai činosardea ma,
astardea ma čeafatar thai linčeardea ma,
çîrdea pa mande sar ande khă çînta.
13 Le săjeçi Lehkă denmaroata anda sal riga;
pusavel mîŕă rîničea bi millako,
šorăl măŕî fierea pe phuw,
14 phagăl ma kotora, kotora,
šudel pe pa mande sar khă marditorii.
15 Astarde mangă khă gono morčeako,
thai peradem muŕo šero ande poši.
16 O roimos lolleardea muŕo mui;
thai ušal le mullimasti sî pe le iakha mîŕă.
17 Varesar či kărdem či khă bikris,
thai o rudimos muŕo sas orkana ujo.
18 Phuwă, na garav muŕo rat,
thai le vatimata mîŕă te na avele rig!
19 Orta akana, o dikhlitorii muŕo sî ando čerii,
o čeačimatorii muŕo sî ande le thana opral.
20 Le prinjeande mîŕă asan mandar,
ta me rudi ma le Devllehkă iasfănça,
21 te kărăl čeačimos le manušehkă angloa Dell,
thai le šavehkă le manušehkă pa lehkă amal.
22 Kă o dindimos mîŕă băršengo pašol koa gor,
thai jeaua pe khă drom katar či mai amboldaua ma.