1 Kukoa kai či delduma rodel so čeaileoles,
xolleaol anda orsavi buti laši.
2 Le čealadehkă nai lehkă sîkaimahko,
ta kamel te sîkavel so jeanel o.
3 Kana avel kukoa o jungalo, avel i o bidikhlimos;
thai ăkh data le lajavesa, avel i o prasaimos.
4 Le divanuri le mohkă khă manušehkă sî sar varesar paia andraimahkă:
o isvoro le xaraimahko sî sar khă šuvoio paiehko kai thavdel biatărdimahko.
5 Nai mišto te avel tu ando dikhlimos o mui kole jungalehko,
kaste bičeačearăs koles le bibezexales kai kris.
6 Le divanuri le čealadehkă anen čiungar,
thai o mui lehko akušel ji kana lel mardimata.
7 O mui le čealadehko anel lehkă xasardimos,
thai le ušt sî lehkă sar ăkh astardimos andoa duxo.
8 Le divanuri le pupuitorehkă sî sar le guglimata:
istran ji ando fundo le poŕăngo.
9 Kon khandinil ande pesti buti sî pral kolesa kai mudarăl.
10 O Anau le Raiehko sî khă turno zuralo;
kukoa o bibezexalo prastel ande leste, thai bešel garado.
11 O bravalimos sî khă četatea zurali anda kukoa o bravalo;
ande lesti godi, oi sî khă zîdo učio.
12 Anglal le xasarimastar, o illo le manušehko phuteol,
ta o meklimostelal jeal anglai slava.
13 Kon delanglal bi te ašunel,
kărîl khă dillimos thai çîrdel pehko lajau.
14 O duxo le manušehko nikrăles koa nasfalimos;
ta o duxo perado tristomastar, kon vazdela les?
15 Khă illo prinjeando astarăl o jeanglimos,
thai o kan kolengo xarane rodel o jeanglimos.
16 Le pativa khă manušehkă kărăn lehkă than,
thai pîtrăn lehkă o šutimos angla kola le bară.
17 Kukoa kai delduma anglal ande pesti rig, fal kă sî les čeačimos,
ta avel o kolaver, thai lel les koa rodimos.
18 E baxleçîrdimasti thol gor le biatearimatăngo,
thai phenel maškar kola le zurale.
19 Le phral le bičeačearde sî mai pharăs line dă sar khă četatea zureardi,
thai le xamata lengă sî sa kadea dă pharăs dinerigate sar le druguri khă khărăhko thagarno.
20 Andoa rodo pehkă mohko čeailearăl pehko manuši o stato,
andoa avimos pehkă uštengo čeaileol.
21 O merimos thai čivava sî ande zor la šibati;
orkon kamelala, xala lakă roduri.
22 Kon arakhăl khă romni laši, arakhăl o baxtalimos;
sî khă xaro kai leles kata o Rai.
23 O čioŕo del duma rudindoi pe,
ta o bravalo delesanglal zorasa.
24 Kon kărăl pehkă but amal, kărăle karing o bibaxtalimos lehko,
ta sî khă amal kai nikrăl mai but tute sar khă phral.