O PSALMUL 104.
1 Dedumadămišto, duxona, le Raies!
Raia, Devlla, Tu san bigorăhko dă baro!
Tu san xureado ando străfeaimos thai barimos!
2 Thos pa Tute e lumina sar i khă raxami:
tinzos le čeruri sar khă çăra.
3 Le paiença kărăs Tukă o gor Te thanehko;
andal norea kărăs Teo urdon,
thai phirăs pel phaka la bravalleakă.
4 Andal bravalea kărăs Tukă solea,
thai andai para la iagati, kanditorea.
5 Tu thodean e phuw pe lakă temelii,
thai čiăkhdata či mištila pe.
6 Tu garadeanas les le andraimasa sar garavesas les kha raxameasa;
le paia bešenas pel baŕlebară,
7 ta, andai dar Tiri, našle,
koa mui le trăsnetohko Tirăhko, line la te našen,
8 anklistoi pel baŕlebară thai ulindoi andel xarea,
ji koa than, kai tu phendeanas les.
9 Thodean lengă khă rig, kai či trăbun te nakhăn la,
anda kaste na mai ambolden pe te garaven e phuw.
10 Tu kărăs te xuten le isvoare andal xarea,
thai on thavden maškar le baŕlebară.
11 Tu des te pen anda lende sa le jivinen le kîmpohkă;
Ande lende ašaven e truši le katîrea le văšune.
12 Le čiriklea le čerehkă bešen pel riga lengă, thai kărăn te
ašundeol pe lengo mui maškar le ŕaia.
13 Andoa than Tiro kukoa o baro Tu tindearăs lebaŕlebară;
thai čeaileol e phuw le rodostar Tiră buteango.
14 Tu kărăs te bareol e čear andal gurumnea,
thai zălenimata anda le manuši,
ta e phuw te del xamos:
15 moll, kai vesălil o illo le manušehko,
zetino, kai mîndrearăl lehko mui,
thai manŕo, kai zurearăl lehko illo.
16 Tindeon le kašt le Raiehkă,
le čedrea andoa Libano kai thodea le O.
17 Ande lende kărăn pehkă kuibo le čiriklea;
ta o kokostîrko sî les o than andel tiparpšea;
18 le baŕlebară le mai uče sî anda le busne le văšune,
ta le kotoralebaŕăhkă sî than anda le šošoia.
19 O kărdea o šuonuto kaste sîkavel le čirururi;
o kham jeanel kana trăbul te perăl.
20 Tu anes o tuneriko, thai kărdeol pe reat:
atunčeara sa le jivine le văšehkă thon pe te mištin;
21 le puii le leiengă çîpin pala o xamos,
thai magăn te xan kata o Dell.
22 Kana lulludearăl o kham, on našen parpale,
thai soven ande pehkă garadimata.
23 Ta o manuši anklel ka pesti buti,
thai butearăl, ji ande reat.
24 Sode dă but sî Te butea, Raia!
Thai e phuw sî pherdi buteança.
25 Dikta e marea tinzome thai e bari:
ande late mištin butimata čivavengă çînoŕă thai bară.
26 Oče ande late, phirăn le beruri,
thai ande late sî o krokodilo kodoa kai kărdean les te khălel pehkă ande lakă valurea.
27 Sa kadala juvindimata ajukrăn Tu,
kaste des le o xamos.
28 Des le Tu, on len les;
pîtrăs Tu teo vast, on čeaileon Te lašimatăndar.
29 Garaves Tu Teo Mui, on izdran;
les Tu lengo phurdimos: on merăn,
thai ambolden pe ande pesti phuw.
30 Trades Tu Teo phurdimos: on sî vazdine,
thai nevearăs kadea o mui la phuweako.
31 Andel veakuri te nikrăl e slava le Raiesti!
Te bukuril pe o Rai Pehkă buteandar!
32 O dikhăl e phuw, thai phuw izdral;
azbal le baŕlebară, thai on thuweaon.
33 Dilabaua le Devllehkă sode traiua,
lăudiua mîŕă Devlles sode avaua.
34 Aven čeaile Lehkă le divanuri mîŕă!
Bukurima le Raiestar.
35 Te xasaon le bezexale pai phuw,
thai kola le jungale te na mai aven!
Dedumadămišto, duxona, le Raies!
Lăudin le Raies.