O PSALMO 135.
1 Lăudin le Raies!
Lăudin o Anau le Raiehko,
lăudin Les, robea le Raiehkă,
2 kai bešen ando Khăr le Raiehko,
andel barea le Khărăhkă e Devllehkă amarăhkă!
3 Lăudin le Raies, kă o Rai sî lašo;
dilaban Lehko Anau, kă sî mištimahko.
4 Kă o Rai alosardea Pehkă le Iakovos,
le Israelos, kaste avel Lehko.
5 Jeanau kă o Rai sî baro,
thai kă o Rai amaro sî mai opral dă sal devla.
6 O Rai kărăl sa so kamel andel čerurii thai pe phuw,
andel mări thai andea sal andraimata.
7 O vazdel le norea katai rig la phuweati,
del kărimos kal trănetea thai koa brîšind,
thai ankalavel e bravall anda lakă odăi.
8 O maladea le anglalkărdinen le Ejiptohkărăn,
katal manuši ji kal jivine.
9 Tradea sămnuri thai šukarimata, ande teo maškar, Ejiptona:
pa o Faraono thai pa sal kanditorea lehkă.
10 Maladea but neamuren,
thai mudardea thagar zurale:
11 le Sixonos, o thagar le Amoriçăngo,
le Ogos, o thagar le Basonohko,
thai sa le tagaren le Kanaanohkă;
12 thai dea le o čem mandimos,
mandimos Lehkă poporohkă le Israelohkă.
13 Raia, o Anau Tiro ašel ando veako;
Raia, o pomenimos Tiro nikrăl neamo neamostar,
14 kă o Rai krisînila Pehkă poporos,
thai avela Les mila anda Lehkă robea.
15 Le idolea le neamurengă sî rup thai sumnakai,
butea kărdine andal vast le manušengă.
16 Sî le mui, ta či den duma,
sî le iakha, thai či dikhăn,
17 sî le kan, ta či ašunen,
E, nai le phurdimos ando mui.
18 Sar lende sî kola kai kărăn le,
sa kola kai patean pe ande lende.
19 Khăr le Israelohko, dendumadămišto le Raies!
Khăr le Aaronohko, dendumadămišto le Raies!
20 Khăr le Levehko, dendumadămišto le Raies!
Kola kai daran le Raiestar,
dendumadămišto le Raies!
21 O Rai te avel dinodumadămišto andoa Siono,
O, kai bešel ando Ierusalimo!
Lăudin le Raies!