O PSALMO 143.
Khă psalmo le Davidohko.
1 Raia, ašun muŕo rudimos,
bandear Teo kan ka mîŕă manglimata!
2 Na šu Tu kai kris Te robosa!
Kă či khă manuši juvindo nai bi bezexako angla Tute.
3 O dušmano phirăl pala muŕo duxo,
ušteavel mîŕî čivava andel pînŕă kai phuw:
kărăl ma te bešeau ando tuneriko,
sar kola kai mulle dă but čiro.
4 Sî tristo o duxo ande mande,
sî biujeardo o illo andral ande mande.
5 Anau mangă godi le desănadar mai anglal,
dau ma godi ka sa Te butea,
dau gîndo kai buti Te vastendi.
6 Tinzo mîŕă vast karing Tute;
vatil muŕo duxo pala Tute, sar pala khă phuw šuti. (Atărdimos) .
7 Iuçîsar ta ašun ma, Raia!
bilal muŕo duxo:
na garau mangă Teo Mui!
Kă sahkă arăsau atunčea sar kola kai ulen ande groapa!
8 Kăr ma te ašunau kana phaŕadeol
o des o lašimos Tiro,
kă pateau ma ande Tute.
Sîkau mangă o drom pe sao trăbul te phirau,
kă Tute vazdau muŕo duxo.
9 Skăpisar ma mîŕă dušmaiendar,
Raia, kă Tute rodau garaimos.
10 Sîkau ma te kărau Teo kamimos, kă Tu san o Dell muŕo.
O Duxo Tiro o lašo te phiravel ma po drom o orta!
11 Andoa Anau Tiro, Raia, ušteau ma;
ando čeačimos Tiro, ankalau muŕo duxo andoa năkazo!
12 Ando lašimos Tiro, xasar mîŕă dušmaien,
thai xasar sa le manušen kai phirăn pala muŕo duxo,
kă me sîm Teo robo.