O PSALMO 22.
Karing o mai baro le dilabaitorengo. Dilabal pe sar „e čerboaika le zorendi” Khă psalmo le Davidohko.
1 Devlla! Devlla! Sostar muklean ma,
thai anda soste dureos bi te kandes ma thai bi te ašunes le roimata mîŕă?
2 Çîpi desă Devlla, thai či des ma anglal:
çîpi i reate, thai sa nai ma xodinimos.
3 Sa Tu san Kukoa o Sfînto,
thai Tu bešes ando maškar le lăudimatăngo le Israelohkă.
4 Ande Tute pateanas amară dadda:
Pateanas pe thai skăpisas le.
5 Çîpinas karing Tute, thai sas skăpime;
pateanas pe ande Tute, thai či ašenas lajavehkă.
6 Ta me sîm termo, na manuši,
arăslem prasaimos le manušengă, thai bidikhlino le poporostar.
7 Sa kola kai dikhăn ma marăn pehkă prasaimos mandar,
pîtrăn pehko mui, den andoa šero, thai phenen:
8 „Pateaia pe ando Rai! Te skăpil les o Rai,
te sastearăl les, anda kă kamel les!
9 E, Tu ankaladean ma anda o păŕ la deiako,
thodean ma koa garaimos anda orsavo grijomos kal čiučea mîŕa deiakă;
10 dă kana sîmas kai čiuči la dati, sîmas tala Teo arakhaimos,
andoa păŕ mîŕa dako sanas muŕo Dell.
11 Na dureao mandar, kă Paši'lo o čiorîmos,
thai khonikh či avel mangă ando kandimos.
12 Ăkh butimos guruwngo sî karing mande,
varesar guruwa andoa Basano den ma angali.
13 Pîtrăn pehko mui pa mande,
Sar khă leo, kai pharavel thai çîpil.
14 Arăslem sar o pai, kai thavdel, thai sa le kokala pîtordeon mangă;
Kărdi'lo muŕo illo sar o mom,
thai bilal ande mande.
15 Šuteol mîŕî zor sar e čikh,
thai asatardeol mîŕî šib le taloiestar:
andean ma ande phuw le merimastii.
16 Kă varesar jukăl okolin ma,
khă kîrdo bikrisako den phirăn pala mande,
pusadine mîŕă vast thai mîŕă pînŕă:
17 sa le kokala daštiua te dinau mangă le.
Ta, on, pîndin ma thai dikhăn ma;
18 xulaven pehkă mîŕă çoale maškar lende,
thai çîrden kai bax anda muŕo gad.
19 Ta, Tu, Raia, na dureo!
Tu, e Zor mîŕî, av iekhatar ande muŕo kandimos!
20 Skăpisar muŕo duxo la sabiatar,
thai e čivava anda le deară le juklengă!
21 Skăpisar ma andoa mui le leohko,
Thai ankalav ma anda le šinga le guruwehkă!
22 Vestiua Tiro Anau mîŕă phralengă,
thai lăudisaraua Tu ando maškar le tidimahko.
23 Kola kai daran le Raiestar, lăudin Les!
Tume sa, e sămînça le Iakovosti, slăvin Les!
Isdran angla Leste, sa tume, sămînça le Israelosti!
24 Kă o čina či prasal, čina či dabadikhăl
le năkazurea kolehkă le bibaxtalehkă,
či garavel Pehko Mui lestar,
ta ašune les kana del mui karing Leste.
25 Ando tidimos o baro, Tu avesa o lăudimos muŕo:
thai pheraua mîŕă solaxaimata angla kola kai daran Tutar.
26 Le čioŕă xana thai čeaileona,
kola kai roden le Raies, lăudina Les:
baxtalo te avel tumaro illo ando veako!
27 Sa le gora la phuweakă anena pehkă godi thai amboldena pe koa Rai:
sa le familii le neamurengă dena čeanga angla Tute.
28 Kă le Raiehko sî o thagarimos:
O stăpînil pal neamurii.
29 Sa kola le zurale pai phuw xana thai dena čeanga i on;
angla Leste bandeona sa kukola kai ulen ande phuw,
kola kai našti te nikrăn pesti čivava.
30 Khă sămînça manušendi kandela Les;
thai dela pe duma poa Rai karing kola kai avena pala lende.
31 Kadala avena thai vestina o čeačimos Lehko,
vestina e buti Lesti le poporohkă kai kărdeola.