O PSALMO 25.
Khă psalmo le Davidosti.
1 Tute, Raia, vazdau muŕo duxo.
2 Ande Tute, Devlla, pateau ma: te na avau dino lajavehko,
kaste na bukurin pe mîŕă dušmaia mandar!
3 E, sa kukola kai patean ande Tute
či avena dine lajavehkă:
Ta lajavehkă avena kukola kai mekăn Tu bi čeačimahko.
4 Sîkau mangă, Raia, le droma Tiră,
thai sîkau ma le droma Tiră.
5 Godear ma ando čeačimos Tiro, thai sîkau ma;
kă Tu san o Dell mîŕă skăpimahko,
Tu san orkana muŕo ajukărimos!
6 An Tukă godi, Raia, Te meklimastar thai Te lašimastar;
kă sî vešnikuri.
7 Na an Tukă godi mîŕă athadimatar andoa tărnimos muŕo,
či le bikrisăngo mîŕăngo;
ta an Tukă godi mandar,
pala Tiri mila, anda Tiro laxšimos, Raia!
8 O Rai sî čeačio thai orta:
anda kodea O sîkavel le bezexalengă o drom.
9 O kărăl kolen le meklinetele te phirăn ande sa so sî orta.
O sîkavel kolen le meklinetelal o drom Pehko.
10 Sa le droma le Raiehkă sî mila thai pateaimos,
anda kola kai arakhăn o phanglimos thai Lehkă mothodimata.
11 Anda o Anau Tiro, Raia,
iertisar mîŕă bikris, kă bari sî!
12 Kon sî o manuši, kai daral le Raiestar?
Kodolehkă o Rai sîkavel lehkă o drom kai trăbul te alol les.
13 O bešela ando baxtalimos,
thai e sămînça lesti stăpînila o čem.
14 O amalimos le Raiehko sî anda kola kai daran Lestar,
thai o phanglimos kărdo Lesa del le sîkaimos.
15 Me amboldau biatărdimahko le iakha karing o Rai,
kă O ankalave la mîŕă pînŕă andai phal.
16 Dikh ma thai avel Tu mila mandar,
kă sîm korkoŕo thai bibaxteako.
17 O biujimos mîŕă illehko bareol:
ankalav ma anda muŕo năkazo!
18 Dikh Ta muŕo čioŕîmos thai o prastaimos muŕo,
thai iertisar sa mîŕă bezexa.
19 Dikh sode sî dă but mîŕă dušmaia,
thai so zuralea xolleasa phirăn pala ma.
20 Arakh muŕo duxo, thai skăpisar ma!
Na mekh ma te avau dino lajavehko kana patea ma ande Tute!
21 Te arakhăl ma o bidošalimos thai o bibezexalimos,
kana thoau muŕo ajukărimos ande Tute!
22 Skăpisar, Devlla, le Israelos anda sea lehkă năkazuri.