O PSALMO 34.
Khă psalmo kărdino le Davidostar, kana kărdea pe dilo angla o Abimelek, thai teleardea našado lestar.
1 Dauadumadămišto le Raies ande sako čiro;
e lauda Lesti avela orkana ande muŕo mui.
2 Te lăudil pe muro duxo ando Rai!
Te ašunen kukola le bibaxtale thai te bukurin pe.
3 Barearăn le Raies, andekhthan mança.
Te lăudisaras saoŕă Lehko Anau!
4 Me rodem le Raies, thai dea ma anglal:
skăpisardea ma sa mîŕă daraimatăndar.
5 Kana amboldes te iakha karing Leste,
străfeas bukurimastar,
thai či pherdeo teo mui lajavestar.
6 Kana çîpil khă bibaxtalo, o Rai ašunel,
thai skăpiles anda sa lehkă nasulimata.
7 O înjero le Raiehko avel ando maškar kolengo kai daran Lestar,
thai skăpile anda o năkazo.
8 Zumaven thai dikhăn so lašo sî O Rai!
Baxtalo sî o manuši kai pateal pe ande Leste!
9 Daran le Raiestar, tume, le sfinçea Lehkă,
kă khančestar či nigrăn lipsomos kola kai daran Lestar!
10 Le puii le leohkă nigrăn lipsomos, thai lengă bokh,
ta kola kai roden le Raiesči nigrăn lipsomos či khă mištimastar.
11 Aven, mîră šeave, thai ašunen ma,
kă sîkavaua tume e dar le Raiestar.
12 Kon sî o manuši, kai kamel e čivava,
thai kamel te aveles rig desăndar baxtalimatănça?
13 Arakh ti šib nasulimastar,
thai le ušt divanurendar athaimahkă!
14 Dureo le nasulimastar, thai kăr o mištimos;
rode e pačea, thai praste pala late!
15 Le iakha le Raiehkă sî pa kola bibezexale,
thai le kan Lehkă len sama kal çîpimata lengă.
16 O Rai amboldel Pehko Mui pa kola le jungale,
kaste khosăl lengo pomenimos pai phuw.
17 Kana çîpin kola bibezexako, O Rai ašunel,
thai skăpile anda sa lengă năkazuri.
18 O Rai sî paše kolendar le illesa phago,
thai skăpil kolen le duxosa linčeardo.
19 Butivar avel o čioŕîmos pa kukoa bibezexako,
ta o Rai skăpiles orkana anda leste.
20 Sa le kokala arakălehkă le,
ta či iekh anda lende te na linčeaol.
21 Kules le jungales mudarăles o čioŕîmos,
ta le dušmaia kolehkă bibezexako sî došalde.
22 O Rai skăpil o duxo Pehkă robengo,
thai či iekh anda kola kai patean pe ande Leste, nai došaldo.