O PSALMO 41.
Karing o maibaro le dilabaitorengo. Khă psalmo le Davidohko.
1 Baxtalo kolestar kai lel sama le čioŕăstar!
Kă ando des le bibaxtalimahko o Rai skăpila les;
2 O Rai arakhăl les thai nikrăles ande čivava.
O sî baxtalo pe phuw,
thai či mekăs les koa lašo čeailimos lehkă dušmaiengo.
3 O Rai nikărăles, kana sî po than la dukhako:
lesnis lehkă dukha ande sa lehkă nasfalimata.
4 Me phenau: „Raia, avel tu mila mandar!
Sastear muŕo duxo! Kă bezexardem angla Tute.”
5 Le dušmaia phenen nasulimasa pa mande:
„Kana merălla? Kana xasaola lehko Anau?”
6 Kana avel varekon te dikhăl ma, del duma bičeačimata,
tidel došea kaste del ma duma dă nasul;
thai kana telearăl, del duma nasulimos pa mande avreal.
7 Sa mîŕă dušmaia šušotin maškar lende pa mande,
thai patean kă o bibaxtalimos muŕo anela mangă o xasarimos.
8 „Sî astardo dă sa, – phenen on –
dikta les tele, nai te mai uštel!”
9 Orta i kukoa kai traiuas lesa ande pačeasa,
ande sao thoauas muŕo pateaimos thai sao xalas anda muŕo manŕo,
vazdel i o kălkîi pa mande.
10 Ta Tu, Raia, avel tu mila mandar thai vazde ma,
kaste potinau lengă sar daštil pe.
11 Anda kadea prinjeanaua kă kames ma,
kana či izbîndila ma o dušmano muŕo.
12 Tu nikărdean ma, anda muŕo bibezexalimos,
thai thodean ma ando veako angla Tute.
13 Dinodumadămišto te avel o Rai,
O Dell le Israelohko,
andoa veako ande veakoste!
Amin! Amin!